झिंगुक्वःगु बौद्ध बक्तृत्व कला पर्ब क्वचाल

जगतसुन्दर परियत्ति केन्द्रया ग्वसालय् झिंगुक्वःगु बौद्ध बक्तृत्व कला पर्व म्हिगः जगतसुन्दर ब्वनेकुथि येँय् जुल ।

परियत्ति केन्द्रया नायः राजभाई जकःमिया सभाध्यक्षताय् जूगु उगु ज्याझ्वः शाक्य सिंह विहारया धम्मपाल महास्थविरपाखें शील प्रार्थनाया नापं न्ह्याःगु खः । मुक्कं झिंन्याम्हेस्यां बक्तृत्व कलाय् थःथःगु च्वसु ब्वनाः न्यंकादीगु खःसा उकियात कयाः भिक्खु संघरक्षित व गौतमवीर बज्राचार्यं समीक्षा यानादीगु खः । उगु ज्याझ्वलय् एलिना शाक्य व नेहा शाक्य उत्कृष्ट बक्ता जूगु खःसा दर्शकपिन्सं नं नेहा शाक्ययात उत्कृष्ट बक्ता ल्यःगु खः । उत्कृष्ट बक्ता नापं ब्वतिकयादीपिन्त ज्याझ्वःया मूपाहां नापं लोटस रिसर्च सेन्टरया नायः प्रा. डा. भद्ररत्न बज्राचार्य सिरपाः नापं दसिपौ व लुमन्ति चिं लःल्हानादीगु खः । बक्तृत्व कला मू गुथिया नायः देबेन्द्र बज्राचार्य नं नुगः खँ प्वंकादीगु उगु ज्याझ्वलय् जगत सुन्दर परियत्ति केन्द्रया केन्द्राध्यक्ष माया मानन्धरं नीक्वःगु बौद्ध वक्तृत्व कला पर्वया लागि छत्रपुर विहारया सुवर्ण बौद्ध युवा कमिटिया प्रतिनीधि पूर्णमान महर्जनयात पाब्वः लल्हानादीगु खः ।

ज्याझ्वलय् बौद्ध बक्तृत्व कला मू गुथिया दुजः त्रिरत्न मानन्धरं सुभाय् देछानादीगु खः ।

More Stories Like this