प्रम खनालपाखें थप ई माग
माओवादीपाखें सपथ ग्रहणया लागिं थौं तकया अल्टिमेटम
येँ (सन्ध्या टाइम्स)/प्रधानमन्त्री झलनाथ खनालं एकीकृत माओवादीया अध्यक्ष प्रचण्डयाके मन्त्री मण्डल पुनर्गठन यायेगु नितिं थप ई फ्वनादीगु दु ।
माओवादीं थःगु पार्टीया फुक्क हे मन्त्रीतय्गु मंकाः राजीनामा म्हिगः प्रम खनालयात लःल्हासें थौं तकया दुने न्हूपिं मन्त्रीतय्त सपथ ग्रहण याकेमाः धकाः अल्टिमेटम बिउगु खः। तर प्रम खनालं माओवादीयात आः थथें छुं याये मतेनि धासें थःत छुं ई बीत इनाप यानादीगु खः। थौं संवैधानिक समितिया बैठक लिपा खनाल व प्रचण्ड दथुइ जूगु गोप्य भेटवार्ताय् प्रम खनालं उगु इनाप यानादीगु खँ सूत्रं धाःगु दु। वय्कःपिं निम्हेसिया दथुइ सिंहदरवारय् हे गोप्य भेटवार्ता जूगु खः ।
राष्ट्रिय सहमतिया आधारय् हे थः न्ह्याः वनेत्यनागु दु धासें प्रम खनालं भावी राजनीतिक अवस्थायात ध्यानय् मतसे हथासं निर्णय यात धाःसा माओवादी नापं देयया नितिं हे नं प्रत्युत्पादक जुइफुगु खँ माओवादी अध्यक्ष प्रचण्डयात कनादीगु खः। उगु इलय् प्रचण्डं थःगु पार्टीया स्थायी समितिं थौं तकया निंतिं बिउगु अल्टिमेटम थप याये फइगु अवस्था मदु धकाः अडान कयादीगु खँ नं सूत्रं धाःगु दु ।
प्रम खनाल व अध्यक्ष प्रचण्ड दथुइ थौं सनिलय् हाकनं भेटवार्ता जुइगु खँ धाःगु दु ।
थौं हे प्रम व कोइराला नं खँल्हाबल्हा
प्रधानमन्त्री झलनाथ खनाल व नेपाली कांग्रेसया सभापति सुशील कोइराला दथुइ थौं जूगु खँल्हाबल्हाय् शान्ति व संविधानया नितिं न्ह्याः वनेगु खँय् सहमति जूगु दु। सभापति कोइरालाया छेँय् जूगु उगु खँल्हाबल्हाय् कांग्रेसया उपसभापति नापं संसदीय दलया नेता रामचन्द्र पौडेल नं सहभागी जुयादीगु खः। भेटवार्ताय् थःत ग्वाहालि यायेत नापं व्यवस्थापिका संसदयात सुचारु याके बीमाल धकाः नं कांग्रेस सभापति कोइरालायात प्रम खनालं इनाप यानादीगु खः ।
प्रधानमन्त्री खनालं म्हिगः एकीकृत माओवादीपाखें मंकाः कथं मन्त्रीतय्गु राजीनामा पौ थःत बिउगु विषययात कयाः नं नेता कोइरालायात जानकारी बियादीगु खः ।
