नानिभाईयात धर्मादित्य सिरपाः
यल (सन्ध्या टाइम्स)/मां भाय् पुचःपाखें नेपालभाषाया न्हापांम्ह पत्रकार नापं बौद्ध विद्वान भाषाजवाः धर्मादित्य धर्माचार्यया ११० क्वःगु बुदिंया लसताय् म्हिगः छगू ज्याझ्वः यासें झिक्वःगु धर्मादित्य धर्माचार्य सिरपाः नेपालभाषाया च्वमि नानिभाई मिखाद्वँमियात लःल्हात।
नेपालभाषाया थीथी पत्रपत्रिकाय् नियमित च्वसु च्वयाच्वंगुलिं वय्कःया उगु सिरपाः लःल्हाःगु खः। नेपालभाषा आकादेमिया भाइस चान्सलर लक्ष्मण राजवंशीया मूपाहां कथं झाःगु उगु ज्याझ्वलय् ध्याचू च्वमि मदनमोहन मिश्रयात हनेज्या नं याःगु खः ।
मांभाय् पुचःया नायः विजयरत्न शाक्यया सभापतित्वय् जूगु उगु ज्याझ्वलय् सिरपाः व अभिनन्दित व्यक्तित्व बारे सिरपाः कवःया कजि डा. पुष्पराज राजकर्णिकारं कनादीगु खः। पुचःया दुजः हिरारत्न शाक्यं लसकुस न्वचु बियादीगु उगु ज्याझ्वलय् मूपाहां राजवंशी नापं नेपालभाषा मंकाः खलः येँया छ्याञ्जे नरेशवीर शाक्य, नेपालभाषा मंकाः खलः यलया नायः किरण शाक्य, सिरपाः त्याकादीम्ह मिखाद्वँमि, सम्मानित जुयादीम्ह मदनमोहन मिश्रपिंसं नं नुगःखँ प्वंकादीगु खःसा पुचःया दांभरि रत्नमान शाक्यं सुभाय् बियादीगु खः ।
