न्हूम्ह मचायात न्हूकथं नां
अप्वः यानाः मनूतय्सं थः मस्तय् नां देभाजु वा गुर्जुं छुना थकू कथं छुइगु याइ। तर नेपालभाषाया संस्कृतिकर्मी गणेशराम लाछिं पिनें छ्वया हःगु नां मध्ये छगू कयाः थः छय्मचाया नां छुनादिल। झिंन्यान्हु जक दुम्ह मिसाम्ह छय्मचाया नां वय्कलं छुनादिल 'सरगमिला'। म्हिगः जूगु उगु 'नां प्वले ज्याझ्वः'या मूपाहां नेपालभाषा मंकाः खलःया नायः पद्मरत्न तुलाधरं पिनें वःगु नां प्वलाः मचाया नां छुनादीगु खः ।
थःगु म्हसीका हे तनी कथं थौंकन्हय् देशीविदेशी नां तयेगु विकृतियात चीकेगु ताः तयाः थुकथं नेवाः तयेगु ज्याझ्वः यानागु खँ मचाया अबु सन्तोषराम लाछिं कनादिल। मूपाहां पद्मरत्न तुलाधरं मस्तय् नेवाः नां तयेगु ज्यायात च्वछासें नेवाः अज्याःगु खँग्वः शुद्ध नं जुइमाः धासें आः छूगु नां नं 'सरगमिला' मखुसें 'सर्गःमिला' जुइमाःगु खँ कनादिल।
नेवाः देय् दबूया संरक्षक मल्ल के. सुन्दरं थ्व ज्या साधारण थें च्वंसां थुकिया लिउने जातीय आत्मगौरव थकायेगु कुतः जुयाच्वंगु दु धयादिल। नेवाः देय् दबूया नायः नरेश ताम्राकारं थःगु म्हसीका सुरुवात थःगु नामंनिसें हे जुइमाः धयादिल ।
भाजु लाछिं थः छय्मचाया नेवाः नां छुइत सार्वजनिक रुपं नां छ्वया हयेत आह्वान यानादीगु खः। उकी मध्ये अमेरिकाया रोजी महर्जन व थिमिया सजना प्रजापतिं छ्याहःगु 'सरगमिला' नांयात वय्कलं ल्ययादीगु खः। ल्वःगु नां छ्वया हःम्हेसित न्याद्वः तका सिरपाः बीगु धकाः यानातःगु घोषणा कथं निम्हेसित दामासाहीं सिरपाः लःल्हाःगु खः ।
