बाखं दबूया न्यागूगु ल्याः पितब्वज्या
येँ (सन्ध्या टाइम्स)/'बाखं दबू' (बाखं मुना) या न्यागूगु ल्याः म्हिगः पितब्वज्या जुल। बाखं दबूया हे ग्वसालय् जूगु छगू समारोहया दथुइ मूपाहां नेपालभाषा एकेडेमिया चान्सलर सत्यमोहन जोशीं सफूया चिखिफ्यनेज्या यानादीगु खः। ज्याझ्वलय् न्ववासें भाजु जोशीं बाखं दबू चिकिचाधंगु संस्थाया रुपय् नीस्वंगु खःसां निदँत्याया दुने भाषा साहित्य नापनापं राजनैतिक रुपं नं बौद्धिक व्यक्तित्वपिंत क्रान्तिया लँपुइ हनेगु ज्या जुयाच्वंगु दु धयादिल। वय्कलं दबूया नायः लक्ष्मण राजवंशीयात नेपाःया हे पासाया संज्ञा नं बियादिल ।
न्हापांम्ह मिसा उपन्यासकार शशिकला मानन्धरं सफुली दुथ्याःपिं नीम्ह मिसा च्वमिपिनि बाखंया समीक्षा यानादिल। उपन्यासकार केदार सितुं बाखं दबूया लक्ष्य व गतिविधिया विषयय् कनादिलसा बाखं च्वमि गोविन्दमान श्रेष्ठं बाखं च्वमि व सम्पादनया दथुइ जुइमाःगु स्वापूया विषयय् चर्चा यानादिल ।
मिसा च्वमिपिंत हे अप्वः महत्व बियाः पिदंगु उगु सफुली २१ पु बाखं मिसा च्वमि व मेमेगु यानाः मुक्कं खुइछपु बाखं दुथ्याः। बाखं ब्वँमिपिनिगु ल्याः अप्वयेकेगु आज्जुं थःपिंसं हे सफू न्यानाः पासा वा थःथितिपिंत इना बीमाःगु खँ नं उगु समारोहय् चर्चा जूगु खः। दबूया नायः लक्ष्मण राजवंशीया सभापतित्वय् न्ह्याःगु उगु ज्याझ्वलय् प्राज्ञ रीना तुलाधरं लसकुस यानादीगु खः ।
