कांग्रेसपाखें सुनसरी बन्द
येँ (सन्ध्या टाइम्स)/प्रहरीया गोलीं कयाः थः कार्यकर्ता सीगु बारे नेपाली कांग्रेसं थौं सुनसरी जिल्ला बन्द यात। बन्द ताःलाकेत कांग्रेस कार्यकर्तातय्सं सुथंनिसें सदरमुकाम इनरुवाय् प्रदर्शन यानाच्वंगु दु। उमिसं इटहरी, धरान नापं मेमेगु जिल्लाय् नापं प्रदर्शन यानाच्वंगु दु ।
कांग्रेसं उगु घटनाय् प्रहरीं दमन यानाः थः कार्यकर्ता स्याःगु द्वपं बिसें भर्त्सना याःगु दु। कांग्रेसं दोषीयात कारवाही यायेमाःगु, सीम्हेसिया छेँजःयात क्षतिपूर्ति बीमाःगु, सीम्ह कार्यकर्तायात सहिद घोषणा यायेमाःगु माग यानाच्वंगु दु।
सुनसरीया देवानगञ्जय् वंगु शुक्रवाः व्यापारी व प्रहरी दथुइ ल्वापु जूगु इलय् प्रहरीं चलेयाःगु गोलीं कयाः कांग्रेस कार्यकर्ता सानु यादव घाःपाः जूगु खः। लिपा वासः याकुयाकुं यादव म्हिगः बहनी सीगु खः ।
उगु लागाया मधेसवादी दलतय्सं नं कांग्रेसया उगु बन्दयात ग्वाहालि यानाच्वंगु दु ।
