लुम्बिनीइ जुइत्यंगु चिनियाँ लगानी

लुम्बिनीयात विश्वया हे छगू न्ह्यथनेबहःगु धार्मिकस्थल दयेकेगु ताः तयाः चीनया छगू गैससं राष्ट्र संघया समेत संलग्नताय् ३ अर्ब डलर दां लगानी याइगु धकाः पिहां वयाच्वंगु समाचारयात कयाः देशय् विशेष कथंया चर्चा सुरु जूगु दु। आः तक पिने सम्झौता जुयाः पिने हे जक गतिविधि जुयाच्वंगु थ्व ज्या नेपालय् गुकथं प्रवेश जुइ धइगु निश्चित मजूनि। तर दुने दुने धाःसा चीनं यायेत्यंगु ज्या जूगु कारणं उकियात भारतीय पक्षं विरोध सुरु याना हयेधुंकूगु दु। थ्व ल्याखं लुम्बिनी विकासया थ्व न्हूगु पक्ष आः चीन व भारत दथुइ शितयुद्ध ग्वाकीगु विषय जकं जुया बीगु खः लाकि धइगु शंका ब्वलंगु दु। लुम्बिनीयात बुद्ध जन्मस्थल धकाः भारतं थौं तक नं नुगलंनिसें स्वीकार मयाःगु, लुम्बिनी विकासया नामय् चीनं भारतीय सीमाय् थ्यंक वयाः गतिविधि याये फइगु आदि कारण क्यनाः भारत सशंकित जूगु जुइफु। तर लुम्बिनी थेंज्याःगु राष्ट्र संघं समेत रुची तयाच्वंगु थाय्या विकास यायेगु धकाः चीन वा विश्वया छुं नं देशं इच्छा क्यन धाःसा उकियात भारतं विरोध यायेमाःगु आवश्यकता मदु। थ्व नेपाः व सम्बद्ध देशया आपसी स्वापूया खँ खः। न्ह्याःसा उकी भारतं ग्वाहालि यायेफु। तर विरोध यायेमाःगु खँ मदु। छुं जुयाः लुम्बिनी विकासया ज्या जुजुं वनाच्वंगु इलय् भारतयात मछिंगु छुं खँ जुल धाःसा अबलय् टिप्पणी यायेगु अधिकार वयाके सुरक्षित दु ।

मेखे लुम्बिनीइ जुइत्यंगु थ्व लगानी नं आः तक छु खः धइगु स्पष्ट मजूनि। नेपाःया सरकारं थुकिया बारे छुं न्ववाःगु मदुनि। लगानी व लगानीकर्ता संस्थाया बारे वयाच्वंगु भ्रम नं मदयेकेगु ज्या नापनापं जुइमाः ।

More Stories Like this