कम्युनिष्ट पार्टीया संस्थापक सरहम्ह 'काइला बाः’ यात तःजिक हन

यल (झीगु स्वनिगः)

नेपाल कम्युनिष्ट पार्टीया संस्थापक सरह नालातःम्ह बरिष्ठ कम्युनिष्ट नेता देवेन्द्र लाल श्रेष्ठ 'काइला बाः' यात वंगु शुक्रवाः यलय् ज्याझ्वःया दथुइ तःजिक हनेज्या याःगु दु । देबेन्द्रलाल श्रेष्ठ -काइला बाः) जन अभिनन्दन मूल समारोह समितिपाखें वय्कः ८८ दँ पूवंगुलिं हनेज्या याःगु खः । एकीकृत नेवाः राष्ट्रिय मुक्ति मोर्चा नेपाःया नायः दिलबहादुर श्रेष्ठया सभापतित्वय् बदन शर्मां न्ह्याकादीगु उगु समारोहलय् ग्वसाः खलःया कजि दिपेन्द्र महर्जनं लसकुस न्वचु बियादीगु खः । ज्याझ्वलय् ग्वसाः खलःया दुजः कृष्णलाल महर्जनं काइला बाःया जीवनी न्ह्यब्वयादीगु खःसा जीवनीयात कयाः प्रा. माणिकलाल श्रेष्ठं न्वंवानादीगु खः । एकीकृत नेकपा माओवादीया नायः पुष्पकमल दाहाल प्रचण्ड मूपाहांया थासं न्वंवानादीगु उगु ज्याझ्वलय् नागरिक समाजपाखें डा. सुन्दरमणि दिक्षीतं नं न्वंवानादीगु खः ।