न्हूपिं मन्त्रीतय्त सपथग्रहणया नितिं २४ घण्टाया अल्टिमेटम

येँ (झीगु स्वनिगः)

एकीकृत नेकपा -माओवादीं) प्रधानमन्त्री झलनाथ खनलयात २४ घण्टाया अल्टिमेटम ब्यूगु दु । एकीकृत माओवादीं म्हिगः शनिवाःनिसें थौं अइतवाः तकया अल्टिमेटम ब्यूगु खः । थौं आइतवाः तकया दुने नं एकीकृत माओवादीपाखें सिफारिस याःपिं न्हूपिं मन्त्रीतय्त सपथ ग्रहण मयाकल धाःसा वर्तमान सरकारयात यानातःगु समर्थन लित काइगु संभावना अप्वया वःगु दु । वय्कलं थौं आइतवाः सुथय् तकया दुने सपथ ग्रहण याकेत प्रधानमन्त्री झलनाथ खनालयात माग यानागु दु धयादिसें माओवादीया प्रवक्ता शर्मां धयादिल 'थौं आइतवाः तकया दुने नं सपथ ग्रहण यायकेगु ज्या मजुल धाःसा माओवादीं कठोर निर्णय याइ ।'
संचरकर्मीतय्सं थौं आइतवाः तकया दुने न्हूपिं मन्त्रीतय्त सपथ ग्रहण मयाकल धाःसा सरकारयात यानातःगु समर्थन लितकायेगु धकाः अथे कठोर पलाः ल्ह्वनेगु धयादीगु खः ला धकाः न्यंगु न्ह्यसःया लिसः बिइगु झ्वलय् एकीकृत माओवादीया प्रवक्ता दिनानाथ शर्मां धयादिल 'अथे हे थुइकादिसँ ।'

माओवादीया केन्द्रीय कमिटीया बैठकं हे वर्तमान सरकारय् पार्टीया न्वकु नारायणकाजी श्रेष्ठ प्रकासया नेतृत्वय् न्हूगु हे पुचः सरकारय् छ्वयेगु धकाः निर्णय यानाः प्रधानमन्त्री खनालयात न्हू मन्त्री जुइपिनिगु नां धलः तकं लःल्हाये धुंकूगु दुसा अथे मन्त्रीत हिलेगु थःपिनिगु पार्टीया अधिकारया खँ खः धकाः माओवादीया नेतातय्सं धयाः वयाच्वंगु दु ।