माओवादीं फुक्क मन्त्रीत लितसःतल

येँ (झीगु स्वनिगः)

संधिवानसभाया दक्ले तःधंगु दल एकीकृत नेकपा -माओवादी)या म्हिगः शनिवाः च्वंगु स्थायी समितिया मुँज्यां थःपिनिगु पार्टीपाखें सरकारय् वनाच्वंपिं फुक्क हे मन्त्रीतय्त लित सःतेगु धकाः निर्णय याःगु दु । माओवादी पार्टीया केन्द्रीय ज्याकू येँया कोटेश्वरय् च्वंगु पेरिसडाँडा स्थायी समितिया मुँज्या च्वनाः अथे निर्णय याःगु खः । प्रधानमन्त्री झलनाथ खनालं थःपिन्सं सिफारिस यानापिं न्हूपिं मन्त्रीतय्त सपथ ग्रहण मयाकूगुयात कयाः गम्भीर आपत्ति प्वंकेगु ज्या तकं याःगु दु । अथे माओवादीपाखें गम्भीर आपत्ति प्वंकुसें थःपिनिगु पार्टीपाखें सरकारय् वनाच्वंपिं फुक्क हे मन्त्रीतय्त लितसःतेगु धकाः निर्णय याःगु दु धकाः माओवादीया छम्ह नेतां धयादीगु दु । माओवादीया प्रवक्ता दिनानाथ शर्मां स्थायी समितिया मुँज्या लिपा संचारकर्मीतलिसे खँल्हासें धयादिल 'पार्टीया सिफारिस कथं मन्त्रीतयत सपथ ग्रहण मयाकूगुलिं जिमिसं गम्भीर रुपं कयागु दु । सरकारय् सहभागी जुयाच्वंपिं फुक्क हेे मन्त्रीतय्त लित सःतेगु निर्णय जूगु दु ।'

अथे संविधानसभाया दक्ले तःधंगु दलं हे थःपिनिगु दलया फुक्क मन्त्रीतय्त लित सःतेगु धकाः निर्णय यायेवं वर्तमान सरकारप्रति न्ह्यसःचिं दनावःगु दु कि आः माओवादीया प्रस्तावयात स्वीकार मयात धाःसा थ्व सरकारयात नैतिकताया संकत ब्वलनी । एकीकृत माओवादीं अथे न्हूपिं मन्त्री जुइपिं सिफारिस यानाः छ्वःगुयात कयाः नेपाली कांग्रेस व एमालेया केपी शर्मा ओली व माधव नेपाल पक्षधरया नेतातय्सं विरोध यानाः वयाच्वंगुलिं देशय् हे छगू कथं राजनीतिक अस्थिरता ब्वलना वःगु दु धकाः मनूतय्सं टिप्पणी यानाहःगु दु ।