नेवाः नां तयेगु न्हूगु पह:

नेवाः मचातय्त नेवाः हे नां तयेगुलिइ हःपा जुइकथं म्हिगः छगू ज्याझ्वः यासें न्हूम्ह बूम्ह मचाया नां छूगु दु । संस्कृतिविद् भाजु गणेशराम लाछिया छय् सन्तोषराम लाछिया म्ह्याय् वंगु निवाः न्ह्यः पुन्हि खुन्हु बूगु खःसा उबलय् हे थ्व न्हूम्ह मचाया नां नेवाः नां तयेत सकलसिके ल्वःगु नां बियादीत इनाप याःगु खः ।

थ्यंमथ्यं १०० गू नां दुतवःगु खःसा उकि मध्ये छगू ल्यया म्हिगः उगु ज्याझ्वलय् व ल्वःगु नां छ्वयाहःम्हेसित सिरपा नं ब्यूगु खः । न्याद्वः तका दांया सिरपा नं घोषणा यानातःगु उगु नां दुतिनेगुलिइ यु.के.या रोजि श्रेष्ठ व थिमिया सजना प्रजापतिं छ्वयाहयादीगु 'सरगमिला' नां ल्यःगु खःसा थ्व नां छ्वयाहयादीम्ह सजना प्रजापतियात म्हिगः हे नेपाल भाषा मंकाः खलःयेँया नायः भाजु पद्मरत्न तुलाधारं सिरपा लःल्हाना दिल । यु.के.या रोजि श्रेष्ठजुयात चाहिं लिपा वय्कःया ल्हाःतिइ सिरपा थ्यंकाःवीगु धयादीगु दु ।

नां प्वले ज्याझ्वलय् नां प्वलादिसें मू पाहाँ तुलाधारं 'थ्व स्वयेबलय् चिकिचाधंगु व भ्वासी पहथें खनेदुसां झीगु भाषा आन्दोलनय थःगु पहिचानया सवालय् उतिकं हे मू वं' धयादिल । पिने देशया प्रभावं याना झीसं थःपिनिगु नां नेवाः पहः मवयेक न्ह्याग्गुं नां तयाच्वना गुकिंयाना झीगु म्हसिका हे तनावनीथें च्वनेधुंकूगु थ्व इलय् थ्व ज्याझ्वलं झी सकसितं हःपा जुइगु व नेवाः नां तयेगुलिइ प्रेरणा जुइगु धयादिल ।

ज्याझ्वलय् न्हूम्ह मचा सरगमिलाया अबुजु भाजु सन्तोष प्रजापतिं लसकुस यानादीगु खःसा नेवाः देय् दबूया संरक्षक मल्ल के.सुन्दर, नेवाः देय् दबूया नायः नरेश ताम्राकारं थःथःगु नुगः खँ तयादीगु खः ।

More Stories Like this