झिक्वःगु धर्मादित्य धर्माचार्य सिरपाः लःल्हात
नेपालभाषाया च्वमि नानीभाइ मिखाद्वंमियात छगू ज्याझ्वःया दथुइ धर्मादित्य धर्माचार्य सिरपाः लःल्हात ।
थौं मांभाय् पुचःया ग्वसालय् जूगु उगु ज्याझ्वलय् मूपाहां बाखं दबूया नायः लक्ष्मण राजवंशीं च्वमि मिखाद्वंमियात उगु सिरपाः कथं सिरपाःस न्याद्वः व छतका नापं लिपौ लःल्हानादीगु खः । नापं उगु ज्याझ्वलय् नांजाःम्ह च्वमि मदनमोहन मिश्रयात मांभाय् हनापौ नं लःल्हा:गु खः ।
ज्याझ्वलय् सिरपाः कमिटीया कजि डा. पुष्पराज राजकर्णिकारं नेपालभाषा पतिइ दच्छियंक पिहांवःगु च्वसुया मूल्यांकन यानाः बीगु थुगु सिरपाःया मूल्यांकनया आधारयात कयाः न्ववानादीगु खःसा नेपालभाषाया वाःपौ "देशय्मरु झ्याः"स मदिक्क थःगु च्वसा न्ह्याकादीगुलिं थुगु सिरपाः बिउगु खँ धयादीगु खः ।
नेपालभाषा मंकाः खलः येँया मूछ्यांजे नरेशवीर शाकय, मंकाः खलः यलया नायः किरण शाक्यं भिन्तुना न्वचु बियादीगु उगु ज्याझ्वलय् सिरपाः कयादीम्ह नानीभाइ मिखाद्वंमि व मदनमोहन मिश्रं नं थःथःगु बिचाः प्वंकादीगु खः ।
मांभाय् पुचः यलया नायः विजय शाक्यया सभाध्यक्षताय् ज्याझ्वः जूगु खः । पुचःपाखें दँय्दसं बिया वयाच्वंगु धर्मादित्य धर्माचार्य सिरपाः थुगुसि झिक्वःगु खुसी ल:ल्हगु ख: ।
More Stories Like this
काेरियाय् नेवाः भ्वय्, नम्रता श्रेष्ठयात हन न्यूयाेर्कय् इहि राजनीतिक दलतय् घोषणापत्र व नेवाः दृष्टिकोण किपुली मंकाः बाखं गोष्ठि "वर्तमान राजनीतिक संन्दर्भय् नेवाः स्वायत्त राज्य" सम्बन्धि गोष्ठी
