नेवाः ल्याय्म्ह दबू नीस्वन

नेवाः ल्याय्म्हतय्त संगठित यानाः थःगु हक अधिकार प्रति जागरुक यायेगु ताःतुना नेवाः ल्याय्म्ह दबू नीस्वंगु दु ।

नेवाः देय् दबू संगठन विभागया ग्वसालय् थौं येँया मासंगल्लीस्थित प्रदिप्त पुस्तकालयलय् जूगु छगू ज्याझ्वःया दथुइ सत्यनारायण डंगोलया नेतृत्वय् ३७म्ह दुजः दुगु तदर्थ कार्यसमिति नीस्वंगु खः । उगु कार्यसमितिइ रमेश महर्जन व पवित्रा श्रेष्ठ न्वकु, सोभित कृष्ण श्रेष्ठ मूछ्याञ्जे, कृपेन्द्र अमात्य छ्याञ्जे व कुमार प्रधान दांभरि कथं च्वनादीगु दु ।

देय् दबूया नायः नरेश ताम्राकारया सभापतित्वय् जूगु उगु ज्याझ्वलय् मू पाहाँ देय् दबूया संरक्षक लक्ष्मण राजवंशीं संसारय् न्ह्याथाय् नं हिउपाया सम्वाहक ल्याय्म्हत हे जूगुलिं ल्याय्म्ह दबूयात छगू संकल्प सहित संगठित जुयाः न्ह्याः वनेत सुझाव बियादिल ।

अथेहे देय् दबूया मेम्ह संरक्षक मल्ल के. सुन्दरं नेवाःतय् आपालं संगठनत दुसां यक्व थें संगठनया जनआधार कमजोर जूगुलिं बांलाक ज्या यायेमफुगु धयादिसें ल्याय्म्ह दबूलिं जनआधार निर्माण यानाः नेवाःतय् शक्ति निर्माण यायेगु अभियान कथं न्ह्याकेत इनाप यानादिल ।

देय् दबूया नायः ताम्राकारं नेवाः हक हितया निंतिं न्हूगु कथं आन्दोलन यायेमाःगु आवश्यक्ता दुगु धयादिसें ल्याय्म्ह दबूयात आन्दोलनया न्ह्यलुवा जुयाः न्ह्यावनेफयेमाः धकाः भिंतुना बियादिल ।

ज्याझ्वलय् देय् दबूया सल्हाकार ई. मोहनकृष्ण डंगोल, देय् दबू येँया नायः न्हूच्छेकाजि महर्जन, देय् दबू सुदुरपश्चिमाञ्चलया न्वकु दिपक शाक्य, नेवाः विद्यार्थी दबूया नकिं रिसा श्रेष्ठ व आदिवासी युवा महासंघया मूछ्याञ्जे ज्ञानेन्द्र पुनं ल्याय्म्ह दबूयात भिंतुना बियादीगु खः ।

More Stories Like this