चीन-भारत रणभूमि लुम्बिनी
लुम्बिनी विकास यायेत चीनं हःगु प्रस्तावयात भारतया विरोध
येँ (सन्ध्या टाइम्स)/बुद्ध जन्मभूमि लुम्बिनीइ राष्ट्र संघलिसे जानाः चीनया छगू गैरसरकारी निकायं ३ अर्ब डलर लगानी याइगु धकाः पिहां वःगु समाचारयात कयाः भारत थारान्हूगु दु। चीनं मुस्मांतय् मक्का थें लुम्बिनीयात नं उलि हे महत्वं जाःगु थाय् दयेकेगु धकाः आः नकतिनि राष्ट्र संघया छगू निकायलिसे सम्झौता याःगु खः। भारतं परोक्ष रुपं उगु सम्झौताया विरोध यासें उकियात लागू याके मबीगु लागिं पलाः ल्ह्वना हयेधुंकूगु खँ विज्ञ सूत्रं धाःगु दु ।
दकलय् न्हापां ला भारतं बुद्ध जन्मभूमि नेपाःया लुम्बिनी मखु धकाः आः नं प्रमाणित यायेत स्वयाच्वंगु दनि। उकिं लुम्बिनीइ जुइत्यंगु थज्याःगु अन्तर्राष्ट्रिय लगानीयात वं विरोध याइगु स्वाभाविक खः। मेगु खँ, लुम्बिनी भारतया सीमा लागाय् लाःगु थाय् जूगुलिं अनं चीनं अर्बौं डलर लगानी यायेगु नामय् भारतयात सीमाय् हे वयाः निगरानी तइगु व भारत विरोधी ज्याखँ समेत याइगु सम्भावना दु धासें भारत उकिया विरोधय् लगे जूगु दावी सूत्रया दु ।
भारतीय सीमाय् लाःगु थाय् जुयाः लुम्बिनीइ चीन याकःचां लगानी यात धाःसा उकियात भारतं शंका याइ धकाः हे चीनं राष्ट्र संघया साथ काःगु नं सूत्रया दावी दु। लिसें थ्व ज्या चीन सरकारं मखुसें अनया छगू गैससपाखें यायेत्यंगुलिं थ्व नं चीन सरकारया रणनीति जकं खः लाकि धइगु आशंका नं याना हःगु दु ।
थ्व ज्या न्ह्याकेत्यंगु चीनया एपेक नांगु संस्थाया उपाध्यक्ष माओवादीया अध्यक्ष प्रचण्ड खः ।
