चिनियालालयात चित्तधर, चित्तरञ्जनयात भाषाथुवाः

नेपालभाषा परिषद्या थीथी सिरपाः घोषणा

येँ (सन्ध्या टाइम्स)/नेपालभाषा परिषदं दँय्दसं बीगु याना वयाच्वंगु थीथी सिरपाः व उपाधि घोषणा जूगु दु। परिषदं बिउगु जानकारी कथं थुगु दँया चित्तधर सिरपाः स्वनिगलं पिने पाल्पा तानसेनय् च्वनाः खुगू दशक न्ह्यवंनिसें नेपालभाषा साहित्य ख्यलय् न्ह्यथने बहःगु सेवा याना वयाच्वनादीम्ह चिनियालाल वज्राचार्ययात बीगु जूगु दु।
अथे हे निबन्ध विधाय् बीगु ठाकुरलाल सिरपाः नेपालभाषा साहित्यया हास्यव्यंग्य निबन्ध विधाय् च्वन्ह्याःगु योगदान बियादीम्ह केशरत्न शाक्ययात बीगु निर्णय जूगु दु ।

लिसें मिसा च्वमिपिंत बीगु मोलिलक्ष्मी सिरपाः नेपालभाषाया बाखं व प्याखं विधाय् विशेष सेवा यानादीम्ह मय्जु प्रकाश प्रधानांगयात बीगु जूगु दु । उकथं हे नेपालभाषा साहित्य ख्यलय् खुगू दशक न्ह्यवंनिसें थीथी कथं प्रशंसनीय सेवा याना वयाच्वनादीम्ह भाजु चित्तरञ्जन नेपालीयात 'भाषाथुवाः' उपाधिं छायेपीगु नं क्वःजिउगु दु। परिषदं छगू ज्याझ्वः यासें थुपिं सिरपाःत लःल्हाइगु ग्वसाः दु ।