नेपाःमितय् बुँइ भारतीयतय्सं वा पिउ वल
येँ (सन्ध्या टाइम्स)/बाराया दक्षिण लागाय् लाःगु झिटकैया गाविस वडा नं. ६ स्थित स्थानीय नेपाःमि किसानतय् बुँ कब्जा यानाः भारतीय नागरिकतय्सं वा पीगु ज्या याःगु दु ।
सिमावर्ती भारतीय गां औरैयाय् भारतीय सीमा सुरक्षा बल एसएसबीया जवानतय्गु ग्वाहालि कयाः वःपिं छपुचः भारतीयतय्सं छवाः न्ह्यः नेपाःमि किसानत अम्बिकाप्रसाद जैसवाल, चन्द्रिरका, किशोरी, रामकृत, कामेश्वर, रामप्रवेस हजारा, विरेन्द्र पासवान व मनोज तमारया थ्यंमथ्यं साधे १ बिगाहा जग्गा कब्जा यानाः थःपिंसं तुं वा पिउगु खः ।
नेपाःमितय्सं पुस्तौंपुस्तांनिसें भोगचलन याना वयाच्वंगु बुँ हे कब्जा यानाः उमिसं तःक्वःमछि वा पीगु ज्या याना वयाच्वंगु खँ स्थानीय अम्बिकाप्रसादं कनादीगु दु। तर थुगसी सीमा सुरक्षा बल एसएसबीया हे ग्वाहालि कयाः भूमि कब्जा याः वःगुलिं स्थानीय नेपाःमितय्सं थःगु भूमि कब्जा याःसां छुं याये मफयाः तुलतुलु स्व जक स्वया च्वनेमाःगु खः ।
थनिं स्वदँ न्ह्यः नं भारतीय नागरिकतय्सं थथे हे नेपाःमिपितय् बुँ कब्जा यानाः वा पिउ वःबलय् स्थानीय मनूतय्सं उमित लिना छ्वःगुलिं इपिं मवयाच्वंगु खःसा थुगुसी एसएसबीया हे ग्वाहालि कयाः वा पिउ वःगु खः ।
