मालिकतसें हे तालंग्वल
येँ (झीगु स्वनिगः)
मजदुरतय्सं आन्दोलनयात धकाः येँया लुँहिति लागाया होटल व रेष्टुरेन्टया मालिकतय्सं थःपिनिगु होटल व रेष्टुरेन्ट तालं ग्वयाः बन्द यानाब्यूगु दु । अखिल नेपाल होटल तथा रेष्टुरेन्ट मजदुर संगठन मूल इकाई कमिटीं वंगु जेठ ९ गते लुँहिति बाघदरवार लागाया करिब ३० गू होटल व रेष्टुरेन्टयात थःपिनिगु तलब अप्वयेकेमाःगु, श्रम कानुन बमोजिम विदाया व्यवस्था यायेमाःगु, स्थायी नियुक्ति पौ बिइमाःगु, ड्युटी ८ घण्टाया ब्यवस्था यायेगमाःगु नापं थीथी कथंया न्यागू बुँदाया माग तयाः अथे ज्ञापन पौ लःल्हाःगु खः ।
थःपिनिगु माग लच्छिया दुने नं पूवंकेगु ज्या मयागुलिं मजदुरतय्सं म्हिगः विहिवाः उगु लागाय् प्रदर्शन याःगु खः । अन सुरक्षाकर्मीत ब्यापक रुपं परिचालन याःगु खःसा होटल व रेष्टुरेन्टया मालिकतय्सं थःथःपिनिगु व्यवसायया ज्याकू तकं तालं ग्वयाब्यूगु खः । उगु लागाय् होटल व रेष्टुरेन्टय् जक ज्या याइपिं मजदुरत थ्यंमथ्यं १२ सय दुसा इमिगु जायज मागयात इलय् हे पूवंकेगु ज्या मयागुलिं मजदुरतय्सं निरन्तर रुपं आन्दोलन यायेगु धकाः ख्याच्वः ब्यूगु दु । लुँहिति लागाया थज्वःगु समस्यायात कयाः सरोकारवालापक्षं इलय् हे समाधान मयात धाःसा उकिं यानाः बांमलाःगु लिच्वः लायेफु धकाः स्थानीय मनूतय्सं धाःगु दु ।
