माओवादीया साइज घटेयायेत चुनावय् यंकेगु भारतया डिजाइन
येँ (झीगु स्वनिगः)
एकीकृत नेकपा -माओवादी) दक्ले तःधं जुयाः प्रतिनिधित्व यानाच्वंगु संविधानसभायात भंग यानाः न्हूगु चुनावय् यंकेगु नितिं भारतया डिजाइन कथं नेपाली कांग्रेस व एमाले दुनेया माधव नेपाल व केपी शर्मा ओली पक्षधरया नेतात सक्रिय जुयाच्वंगु दु । एकीकृत माओवादीं सिफारिस याःपिं न्हूपिं मन्त्रीतय्त सपथ ग्रहण मयाके धुनेवं नैतिकताया आधारय् हे भाद्र १४ गते न्ह्यः प्रधानमन्त्री झलनाथ खनालं राजीनामा बिइमालीगु अवस्था वइगु अले उगु इलय् कांग्रेस, एमालेया माधव ओली पक्ष नापं मधेसवादी दलत जानाः बहुमतया आधारय् न्हूगु सरकार दयेकाः संविधानसभायात भंग यानाः न्हूगु चुनावय् वनेफत धाःसा माओवादीया आःया साइज घटेजुइगु तायेकाः न्ह्याः वनाच्वंगु खँ झन झन पुष्टि जुजुं वःगु खः ।
लिपांगु इलय् भारतया गृहमन्त्री पी. चिदम्बरमं नेपालय् न्हूगु चुनाव यानाः दयेकीगु सरकार जक स्थायी सरकार जुइ धकाः संचारकर्मीतलिसे खँल्हासें धयादीगुलिं नं नेपालय् न्हूगु हे राजनीतिक समिकरण यानाः चुनावय् वनेगु नितिं नं भारतपक्षधर नेतात दुने दुने चुनाव यानाः वनेगु तयारी यानाच्वंगु दु धकाः पुष्टि जूगु दु ।
