'भाद्र १४ लिपा राष्ट्रपतियात न्ह्यःने तयाः सैनिक कू यायेगु तयारी’

श्रीकृष्ण ज्यापु

वइगु भाद्र १४ गते तक नं न्हूगु संविधानया एकीकृत मस्यौदा तयार याये मफैगु अवस्थायात विश्लेषण यानाः नेपाली सेनाया उपरथि गौरब सम्शेर राणाया कुतलय् 'सैनिक कू' यायेगु योजना दयेकाच्वंगु दु धकाः सूत्रं धाःगु दु । राष्ट्रपति डा. रामवरण यादवयात न्ह्यःने तयाः अथे कू यायेगु योजना दयेकेगु ज्या जुयाच्वंगु दु । भाद्र १४ गते न्ह्यः नेपालय् दलतय्सं राष्ट्रिय सहमतिया स्थीर सरकार गुगु नं हालतय् दयेके फैमखु धकाः तायेकाः अथे नेपाली सेनाया छगू पुचलं कू यायेगु नितिं दुने दुने तयारी यानाच्वंगु खः धकाः धाःगु दु । उपरथी गौरब सम्शेरं नेपाली सेनाया १८ म्ह जर्नलतय्त साथ कयाः उगु कथं कू यायेगु तयारी यानाच्वंगु खः धकाः सूत्रं धाःगु दु । संविधानसभाया तःक्वःमछि म्याद थप याःगुलिं नेपाःमि जनतातय् दलतप्रति विश्वास झन झन म्हो जुयाः वनाच्वंगु, जनताया जनजीवीकाया सवालय् दलतय्सं वास्ता मयानाच्वंगु, दलया नेतात खनाः जनतात निराश जुयाच्वंगु अले दलतय्गु दथुइ नं ल्वापु जुयाच्वंगु अवस्था जुयाः थ्व हे इलय् मूमू दलया नेतातय्त कुनाः कू याये फत धाःसा पाय्छि जुइ धकाः तायेका अथे तयारी यानाच्वंगु खः धकाः नं धाःगु दु ।

दलतय्सं सरकार संचालन याये मफुगु थ्व ई धैगु छगू कथं दलीय व्यवस्थाप्रति तकं जनतात निराश जुयाच्वन धकाः विश्लेषण यानाः उगु कथं राष्ट्रपति डा. रामवरण यादवयात न्ह्यःने तयाः वने फत धाःसा पाय्छि जुइगु तायेका अथे दुने दुने तयारी यानाच्वंगु खः धकाः सूत्रं न्ह्यथंगु दु । संविधानसभाया म्याद लिपांगु पटक दलतय्सं स्वला थप याःगु ई फुइगु दिं धैगु भाद्र १४ गतेलिपा संविधानसभाया म्याद थप यायेगु विषययात कयाः दलतय्गु दथुइ न्हापासिबें अप्वः बिवाद जुइगु नापं कांग्रेसया नेतात नाप नापं एमालेया नं माधव कुमार नेपाल व केपी शर्मा ओली पक्षधरया नेतात संविधानसभाया म्याद थप मयासे न्हूगु चुनावय् वनेमाः धकाः न्हापासिबें नं सशक्त कथं वइगु जुयाः व ई धैगु तसकं राजनीतिक तरल जुइ धकाः तायेका अथे सेनाया छगू पुचलं तयारी यानाच्वंगु खः धकाः नं धाःगु दु ।
नेपाली सेनाय् दुने हे गणतन्त्रवादीतय्गु पुचलं उपरथी गौरब सम्शेर राणापक्षया उगु कुतःयात गुगु कथं विफल यायेफै धकाः बिचाः यानाच्वंगु दु धकाः सूत्रं धाःगु दु ।