खनालयात प्रचण्डया थप दवाव
सरकारयात समर्थन लित कायेगु खँय् माओवादी दुने विवाद
येँ (सन्ध्या टाइम्स)/माओवादीपाखें सिफारिस याना हःपिं थः मन्त्रीतय्त सपथ ग्रहण याकेगु ज्याय् प्रधानमन्त्री झलनाथ खनालं आलटाल यानाच्वंगुलिं थौं माओवादी अध्यक्ष प्रचण्ड वालुवाटार वनाः प्रम खनालयात याकनं सपथ ग्रहण याकि धकाः दवाव बियादीगु दु ।
माओवादीं आः प्रस्ताव याःपिं मनूतय्त मन्त्रिमण्डलय् दुथ्याकेगु मखु धकाः एमाले स्थायी समितिं निर्णय हे याना तयेधुंकूगु कारणं आः थ्व बारे प्रम याकःचां जक लिसः बीगु अवस्था मदयाच्वंगु दु। तर छुं जुयाः प्रम खनालं आः प्रस्ताव याःपिं मन्त्रीतय्त सपथ ग्रहण मयाकल धाःसा वय्कःयात थःपिंसं बियातःगु समर्थन लित कायेगु हे जक विकल्प माओवादीयाके ल्यं दइ तर खनाल सरकारयात बियातःगु समर्थन लित कायेगु लाकि मकायेगु धइगु खँय् नं माओवादी दुने धाःसा विवाद पिहां वयाच्वंगु दु ।
माओवादी दुनेया मोहन वैद्य गुट थ्व इलय् खनालयात बियातःगु समर्थन लित कायेमाः धइगु पक्षय् दु। वैद्य पक्षधर पार्टी सभापति सीपी गजुरेलं ला थौं तकया दुने नं खनालं सपथ ग्रहण मयाकल धाःसा वय्कःयात पार्टीं बियातःगु समर्थन लित कायेमाली धयादीगु दु। तर अध्यक्ष प्रचण्ड धाःसा आः तुरुन्त हे समर्थन लित कायेगु पक्षय् मदुनि। वय्कः खनालयात नं अनुकुल जुइक सपथ ग्रहण याकेगु पक्षय् दुसा उकिया लागिं अझ नं कुतः यानाच्वनादीगु दनि। प्रचण्डपाखें लचकपूर्ण प्रस्ताव वःगुलिं प्रम खनालं पार्टी दुने सहलह याये धयादीगु दु ।
एमाले स्थायी समितिया बैठक
सरकार पुनर्गठनयात कयाः माओवादी-एमाले गठबन्धन संकटय् लानाच्वंगु इलय् हे थौं एमाले स्थायी समितिया बैठक नं च्वनीगु जूगु दु। थौं सुथय् ९ बजे हे च्वनेगु धयातःगु स्थायी समितिया बैठकया निंतिं तयारी मगाःगुलिं धकाः न्हिनय् जक च्वनेत्यंगु खः। थौंया बैठकय् मन्त्रिपरिषद्या पुनर्गठन, संविधान निर्माण, न्यागू बुँदाया सहमति नापं शान्ति प्रक्रियाया बारे सहलह जुइगु खँ उपाध्यक्ष वामदेव गौतमं धयादीगु दु। छुं दिं न्ह्यः जक च्वंगु स्थायी समितिया बैठकं एकीकृत माओवादीपाखें छ्वयाहःपिं न्हूपिं मन्त्रीतय्त सपथ ग्रहण याके मजिउ धकाः निर्णय याना तयेधुंकूगुलिं प्रधानमन्त्री नापं एमाले अध्यक्ष झलनाथ खनालयात नं ज्यामछिनाच्वंगु दु ।
