प्रहरीं ज्वंम्हेसित त्वःतकेत बन्द आह्वान
येँ (सन्ध्या टाइम्स)/लत्या न्ह्यः इटहरीइ जूगु गोलीकाण्डय् ज्वंम्ह थः कार्यकर्तायात त्वःतेमाःगु माग यासें प्रमुख प्रतिपक्षी नेपाली कांग्रेसया भ्रातृ संगठन नेवि संघ व तरुण दलं थौं सुनसरी जिल्ला बन्द याःगु दु। बन्दं यानाः अनया मुख्य राजमार्ग समेत बन्द जूगु दुसा सुनसरी जिल्लाया फुक्कं शिक्षण संस्था, बजाः, उद्योग ठप्प जूगु दु ।
बन्द आह्वान याःपिं कांग्रेस कार्यकर्तातय्सं थः कार्यकर्ता निर्दोष खः धासें गबलय् तक प्रहरीं मुद्दा चले याःम्ह शिव न्यौपानेयात त्वःती मखु अबलय् तक अनिश्चितकालीन सुनसरी बन्द यायेगु जुइ धकाः ख्याच्वः बिउगु दु। नेविसंघ व तरुण दलं म्हिगः सांकेतिक रुपं इटहरीया चौरस्ता चोकय् यातायात बन्द याःगु खःसा उकी नेविसंघ सुनसरीया सभापति विकास केसी व सदस्य योगेन राईयात ज्वंगु खः ।
एमाले समर्थित युवा संघया दुजः रुपेश बजगाई व नेपाली कांग्रेस इटहरी नगरया सल्लाहकार काजी दाहालया दथुइ वंगु असार ३० गते ल्वापु जुयाः गोली समेत चले याःगु खः। वहे गोली काण्डय् ल्हाः दुगु आशंकाय् कांग्रेसया झिम्ह कार्यकर्तातय्त प्रहरीं ज्वनाः हतियार तथा खरखजाना ऐन अन्तर्गत मुद्दा चले याःगु खः। लिसें युवा संघया किरण तामाङयात नं ल्वाभः समेत ज्वंगु खःसा मेम्ह कार्यकर्ताया छेँनं ल्वाभः लुया वःगु खः ।
