विश्वविद्यालय हयेत कञ्चनपुर बन्द
येँ (सन्ध्या टाइम्स)/नेपाःया सदूरपश्चिमय् विश्वविद्यालय स्थापना यायेगु निंतिं बजेटया ब्यवस्था मयाःगु खँय् विरोध यासें स्थानीय मनूत व विद्यार्थीतय्सं थौं कञ्चनपुर जिल्ला बन्द याना बिउगु दु ।
बन्दं यानाः अनया जनजीवन प्रभावित जूगु दु। विद्यार्थी नापं अन क्रियाशील जुयाच्वंगु राजनीतिक दलया स्थानीय नेता व कार्यकर्तातय्गु नेतृत्वय् थ्व बन्द याःगु खः। बन्दकर्तातय्सं थौं सुथंनिसें महेन्द्रनगरया दुवाः दुवातय् मुनाः नाराबाजी यायेगु नापं जुलुस प्रदर्शन यानाच्वंगुलिं यातायात, कलकारखाना, शिक्षण संस्था बजाः पूर्ण रुपं ठप्प जूगु दु। स्थानीय मनूतय्सं वंगु झिन्हु न्ह्वंनिसें हे लगातार विरोध प्रदर्शन याना वयाच्वंगु खःसा प्रदर्शनया झ्वलय् तःक्वःमछि हे प्रहरीलिसे ल्वापु नं जुइधुंकूगु दु ।
आर्थिक वर्ष २०६८/०६९ या अनुमानित आय-ब्यय अर्थात बजेटया विवरणय् विश्वविद्यालय स्थापनाया बारे छुं नं खँ दुथ्याका मतःगु खँय् विद्यार्थी, स्थानीय दलया नेता कर्याकर्तातय्सं विरोध यानः वयाच्वंगु खः। विश्वविद्यालय स्थापना संघर्ष समितिं थःपिनि माग पूरा मजुल धाःसा सशक्त आन्दोलन यायेगु ख्याच्वः नं बिउगु दु ।
