पशु सेवाया ध्यबाय् डिभिजन सहकारीया मिखा
ख्वप (सन्ध्या टाइम्स)/पशु सेवा कार्यालयपाखें ख्वपया एकल महिला बचत तथा ऋण सहकारी संस्थायात फा लहीगु लागिं धकाः बिउगु ७ लाख ४५ हजार दामय् डिभिजन सरकारी ज्याकू ख्वपया मिखा वनाच्वंगु खँयात कयाः उगु सहकारीया अध्यक्ष व पदाधिकारीतय्सं चिउताः प्वंकूगु दु। वंगु बैशाखया निगूगु वालय् उगु संस्थायात अनुदान कथं खाताय् जम्मा यानाबिउगु उगु ध्यबा बीगु खँय् डिभिजन सहकारी कार्यालय ख्वपया कर्मचारीतय्सं पंगः थनाः कमिशनया कुतः जुयाच्वंगु खँ सम्बन्धित पीडिततय्सं धाःगु दु ।
संस्थाया अध्यक्ष न्हुछेमाया नागा लगायत लक्ष्मी भण्डारी, उदय भण्डारी व पवन पाण्डेपिं जानाः १२ लाख तका लगानीं खरिपाटीइ सञ्चालन यानाच्वंगु फा लहीगु ज्याय् आः ग्वाहालि जुइकथं उगु दां बिउगुली आः डिभिजन कार्यालयं उगु व्यवसायया मूल्यांकन दोब्बर यानाः उकी २० प्रतिशत जक संस्थायात भाग बीगु मखुत धाःसा उगु संस्थायात वइगु दां हे पनेगु तकं कुतः जुयाच्वंगु खँ सीदुगु दु। थ्व सम्बन्धी भ्वँतय् जबर्जस्ती सही याकेत ब्वना यंकूगुलिं आः न्हुछेमाया नागा व वया साझेदारी व्यवसायीतय् दथुया स्वापू ख्वाउँया वंगु दुसा सहकारी दुने नं ल्वापु सुरु जूगु दु। कि ३ लाखया शेयर कयाः व्यवसाय स्वतन्त्र रुपं यायेमाः, कि मखुसा २० प्रतिशत संस्थाया हैसियत जक कायम जुइगु कथं डिभिजन सहकारी पशु सेवा कार्यालयं छ्वयाहःगु दानय् थःपिनि रजाइँ यायेत स्वयाच्वंगु खँ नं धाःगु दु ।
