हानं पुलांगु हे मोडय् थ्यन राजनीति

सरकार पुनर्गठनया लागिं माओवादीं याःगु प्रस्तावयात प्रधानमन्त्री झलनाथ खनालं अस्वीकार यायेवं देय्या राजनीतिक संकट हानं पुलांगु हे मोडय् लिहां वनाः दिउवंगु दु। माओवादीं न्हूगु टीम सरकारय् छ्वयेगु धकाः निर्णय यायेवं माओवादी टीमया नायः लिसें गृहमन्त्री कृष्णबहादुर महरां राजीनामा बियादीगु दु। टीम लिडरं राजीनामा बिउगुया अर्थ मेपिं सकलें दुजःतय्सं नं राजीनामा बिउगु हे सरह जुइ। थ्व ल्याखं आः सरकारपाखें माओवादी पूर्ण रुपं लिहां वल धाःसां जिउ। गुकिं यानाः सरकार अपूर्ण जूवंगु दु। उकियात पूर्ण यायेत माओवादीं गुगु टीम छ्वया हःगु खः उकियात प्रधानमन्त्रीं स्वीकार यानाच्वंगु मदु। अले थःगु प्रस्ताव अस्वीकार याःम्ह प्रधानमन्त्रीयात चीकेगु हैसियत दुसां माओवादीं अथे नं याये फयाच्वंगु मदु। कारण, थ्व सरकार क्वःदलेसातकि वयां लिपा वइगु सरकार माओवादीया लागिं अनुकुल जुइ धाये मफु। उकिं थःपिं सरकारय् मदुसां नं प्रधानमन्त्री खनालयात समर्थन यायेत माओवादी बाध्य थें जुयाच्वंगु दु। थ्व खँ प्रम खनालं बांलाक हे थू ।

उखे माओवादी याकःचां अज्याःगु प्रस्ताव छ्वया हल धकाः एमालें प्रम खनालयात राजीनामा बिया छ्व धकाः दवाव बियाच्वंगु दु। मेखे सदनय् नं विपक्षी नेपाली कांग्रेसं प्रधानमन्त्रीया राजीनामा माग यानाः बबाल यानाच्वंगु दु। थ्व अवस्थाय् सरकार पूर्ण रुपं पंगु जूवंगु जक मखु प्रधानमन्त्रीया तःधंगु विजोग समेत जूगु दु। अझ दकलय् ला थ्व सरकार दयेकेगु ज्याय् प्रमुख ल्हाः दुगु पार्टी माओवादीया लागिं संकट जुयाच्वंगु दु। माओवादीं आः छु याइ, सकस्यां ध्यान उखेपाखे हे दु ।

More Stories Like this