प्रम खनालयात अझ छुं ई

मन्त्रिपरिषद् पुनर्गठन मयाःगुलिं माओवादीयात झन् हे संकट

येँ (सन्ध्या टाइम्स)/प्रधानमन्त्री झलनाथ खनालं न्हूपिं मन्त्रीतय्त सपथ ग्रहण याकेत थप ई फ्वंगु धासें माओवादीं प्रधानमन्त्रीयात छुं ई बिउगु दु ।

थौं माओवादी स्थायी समितिया बैठकं प्रधानमन्त्री खनालं ई माग यानादीगुलिं मन्त्रिमण्डल पुनगर्ठन यायेत वय्कःयात अझ भचा ई बीगु धकाः निर्णय याःगु खः। एमाले स्थायी समितिं मन्त्रिपरिषद् पुनर्गठन याये मजिउ धकाः निर्णय याःगु नापं कांग्रेसं गुगुं नं हालतय् पुनर्गठन याके बी मखु धासें प्रमया राजीनामा फ्वनाः संसद अबरुद्ध यानाच्वंगु कारणं प्रम खनालयात नं तसकं ज्यामछिंगु नापं वय्कलं थप ईया माग यानादीगुलिं माओवादी थ्व इलय् 'पिउ व स्व' नीति कथं प्रधानमन्त्रीया निर्णय पियाच्वंगु दु। माओवादी उपाध्यक्ष नारायणकाजी श्रेष्ठया नेतृत्वय् न्हूपिं मन्त्रीत छ्वयेगु निर्णय यायेवं थःपिंसं हे समर्थन यानाः दयेकूगु खनाल सरकार तकं संकटय् लाः वंगु दु ।

यदि प्रम खनालं माओवादीं छ्वया हःगु प्रस्ताव कथं मन्त्रिमण्डल पुनर्गठन मयात धाःसा सरकारयात बियातःगु समर्थन लित कायेत माओवादी दवाव सिर्जना जुइफुगु खँ धाःगु दु। तर थ्व इलय् प्रधानमन्त्री जुइम्ह मनू तत्काल तयार मदुगु व थ्व गठबन्धन टुक्रा जुल धाःसा न्हूगु गठबन्धन दयेकेत नं समस्या जुइफुगु कारणं माओवादीं तुरुन्त हे समर्थन लित कायेत नं मछिनाच्वंगु दावी सूत्रं याःगु दु ।

थ्वहे दथुइ माओवादीया गुलिं नेतातय्सं थःपिनि पार्टीया नेतातय्गु ल्वापु समाधान यायेगु नितिं धकाः याःगु निर्णयं यानाः देय् हे ज्यामछिंगु अवस्थाय् लात धकाः नं धायेगु याना हःगु दु। उखे एमालेया माधव-ओली पक्ष नेतातय्सं माओवादीया लिपांगु निर्णययात हे त्वहः दयेकाः प्रधानमन्त्री झलनाथ खनालं याकनं राजीनामा बीमाल धकाः पार्टी दुने दबाब तच्वयेका हःगु दु ।

थौं मन्त्रिपरिषद् बैठक
मन्त्रिपरिषद् पुनर्गठनया विषययात कयाः थौं मन्त्रिपरिषद्या बैठक च्वनेत्यंगु दु। माओवादीपाखें सरकारय् नेतृत्व यानाच्वंम्ह उपप्रधान नापं गृहमन्त्री कृष्णबहादुर महरां राजीनामा बियादीधुंकूगु अवस्थाय् आः गुकथं न्ह्याः वनेगु धइगु खँय् मन्त्रिपरिषद्या बैठकय् सहलह जुइत्यंगु खः। प्रम निवास वालुवाटारय् उगु बैठक च्वनेत्यंगु खः। सरकारं थुगु बैठकयात नियमित बैठक धाःगु दुसां देय्या राजनीतिक अवस्था नापं मन्त्रीतय्गु सवालय् नं सहलह जुइ धाःगु दु ।