प्रचण्डया बुद्धि पौडेलं नं सयेकल
येँ (सन्ध्या टाइम्स)/नेपाली कांग्रेसया उपसभापति नापं संसदीय दलया नेता रामचन्द्र पौडेलं एकीकृत माओवादीया अध्यक्ष प्रचण्डं थें हे संसदीय दलया नेता मत्वःतेगु तर प्रधानमन्त्री पद धाःसा मेम्हेसित बीगु लँपु ज्वनादीगु दु ।
माओवादी अध्यक्ष प्रचण्डं पार्टी दुनेया लाईन संघर्ष व जिम्मेवारीयात कयाः जूगु विवाद ज्यंकेत थः हे संसदीय दलया नेता जुयाच्वनेगु तर थःगु पार्टीपाखें प्रधानमन्त्रीया उम्मेदवारी बीमाल धाःसा उपाध्यक्ष डा. बाबुराम भट्टराईयात थनेगु धकाः सहमति क्यंगु खः। माओवादीइ प्रचण्डं क्यंगु थ्वहे 'ट्रिक' आः कांग्रेसय् रामचन्द्र पौडेलं नं सयेकादीगु दु। पौडेलं नं संसदीय दलया नेता पद मत्वःतेगु तर छुं जुयाः प्रधानमन्त्री पदय् उम्मदेवारी बी माल धाःसा शेरबहादुर देउवायात त्वःतेगु प्रस्ताव न्ह्यःने हयादीगु दु ।
देउवां प्रधानमन्त्रीया उम्मेदवार थः जुल धाःसा माओवादी व एमालें नं समर्थन याइ धकाः दावी यासें संसदीय दलया नेता हिले माल धकाः सः तयाच्वंगु दु। उकियात हे मिले याये कथं पौडेलं प्रधानमन्त्रीया उम्मेदवारी त्वःतेमाःसा त्वःता बी तर दलया नेता धाःसा त्वःते मखु धयादीगु खः। थःगु थ्व न्हूगु प्रस्तावयात कयाः वय्कलं थःनाप सतीपिं केन्द्रीय नेतातलिसे सहलह ब्याकादीगु खँ सीदुगु दु। थ्वहे झ्वलय् कांग्रेस केन्द्रीय कार्यसमितिया बैठक थौं नं च्वनीगु जूगु दु ।
थौं सनिलय् च्वनीगु उगु बैठकय् व्यवस्थापिका संसदय् प्रधानमन्त्री झलनाथ खनालया राजीनामायात कयाः गुकथं सशक्त भूमिका म्हितेगु, संसदीय दलया नेताया सवालय् पार्टी दुने जुयाच्वंगु विवादयात गुकथं ज्यंकेगु, पार्टीया विधानंनिसें सांगठनिक संरचना नापं देय्या लिपांगु राजनीतिक अवस्थायात कयाः नं सहलह जुइ धाःगु दु ।
