लेखाय् वयेमाःपिं मन्त्री व सचिव श्रीलंकापाखे
येँ (सन्ध्या टाइम्स)/कृषि क्षेत्रया आः तकया अवस्था व समग्र कृषि नीतिया बारेब्वलनाच्वंगु न्ह्यसःया लिसः बीत संसदया लेखा समितिं थौं सुथय् सःतातःगु बैठकय् कृषिमन्त्री हरिनारायण यादव व सचिव उमाकान्त झा उपस्थित मजुइवं लेखा समितिं आपत्ति प्वंकूगु दु। थौं सुथय् ८ बजे वय्कःपिंत सःतातःगु खःसा श्रीलंका वनेगु तयारी यानाच्वंपिं वय्कःपिं निम्हं उपस्थित मजूगु खः ।
थ्वसिबें न्ह्यःया उपस्थित जुयाः मन्त्रीं थप छलफलया नितिं थौं बुधवाः बैठक च्वनेगु अले वयेगु धकाः बचं बियाः बिना जानकारी उपस्थित मजूगुलिं समितिं आपत्ति प्वंकूगु खः। लेखा समितिया सभापति रामकृष्ण यादवं मन्त्रीया अनुपस्थितिबारे मन्त्रिपरिषद्यात जानकारी बीगु जुइ धयादीगु दु। उगु खँयात कयाः प्रधानमन्त्रीया ध्यानाकर्षण याइगु जूगु दु ।
बैठकय् मन्त्री व सचिव उपस्थित मजुइवं आः साउन १६ गते प्रधानमन्त्री झलनाथ खनाल, उपप्रधान नापं अर्थमन्त्री भरतमोहन अधिकारी नापं सरोकारवाला मन्त्रालयया सचिवतय्त सःतेगु धकाः नं लेखा समितिं निर्णय याःगु दु ।
