पचली भैरवया ग्वय्दां

थुगुसी न्यायेकीगु पचली भैरवया झिंनिदँ जात्राया ग्वय्दां म्हिगः हनुमानध्वाखाया नासःचुकय् च्वंगु पुलांम्ह जुजुया गद्दीइ दिकातःगु खड्गय् तयेगु ज्या जुल ।

खड्ग सिद्धि जात्रा संचालक समितिपाखें बाजं व ब्यानर सहित वंगु पुचलं पुलांम्ह मल्ल जुजु फ्यतुइगु धयातःगु गद्दीइ तुं दिकातःगु खड्गय् ग्वय्दां तःगु खः। उकी तग्वःगु ग्वय्, वहःया पाँय्म्वः, स्वां व सिसाबुसा छाःगु खः।
बाजं थानाः वःगु उगु पुचलय् खड्गसिद्धि प्याखनय् पचली भैरव जुयाः प्याखं हुलीम्ह प्याखंम्वलं ग्वय्दां तयादीगु खः। खड्गयात अथे ग्वय्दां तःगुया अर्थ जात्राय् बिज्याहुँ धकाः आमन्त्रण याःगु खः ।

थगुने तक अथे ग्वय्दां तयेगु ज्या नारायणहिति दरवारय् वनाः जुजुयात तःगु खः। आः जुजु हे मदयेधुंकूगु कारणं प्रतिक स्वरुप मल्ल जुजुया खड्गयात ग्वय्दां तःगु खः।
थ्व जात्राय् मोहनिया चालं कुन्हु जुजुलिसे खड्ग हिलेगु चलन दु। थुगुसी सुंलिसे हे खड्ग महिसे अथे हे गद्दीइ तयातःगु खड्गलिसे तुं हिलेगु निर्णय जात्रा संचालक समितिं यायेधुंकूगु दु ।