माओवादीया प्रस्ताव अस्वीकार यायेया अर्थ

प्रधानमन्त्री झलनाथ खनालं थःत समर्थन यानाच्वंगु पार्टी माओवादीपाखें पेश याःगु मन्त्रिमण्डल पुनर्गठनया प्रस्ताव अस्वीकार यासें थःत सरकारय् च्वने मयल धइगु स्पष्ट संकेत बियादीगु दु। वय्कलं थ्व स्वयां न्ह्यः नं माओवादी अध्यक्ष प्रचण्डयात थः प्रधानमन्त्री जुयाः गुलि नं ज्या याये धकाः च्वनागु खः, अथे छुं हे मजूगु कारणं आः थः ताःई कुर्सीइ च्वंच्वने मखुत धकाः तप्यंक हे धयादीगु समाचारत पिहां वयाच्वंगु खः। थ्वहे सन्दर्भय् माओवादीं न्ह्यब्वःगु मन्त्रिपरिषद् पुनर्गठनया प्रस्तावयात अस्वीकार यानाः वय्कलं थःत चीका छ्वयेगु वातावरण थम्हं हे तयार यानादीगु दु। खतुं माओवादीं वय्कःयात छुं ई बिचाः यायेगु 'अवसर' नं बिउगु दु। तर वय्कलं उकियात ध्यान तयादीगु खने मदु ।

थ्व इलय् प्रम खनालयात चीकेगु नं माओवादीया लागिं हितकर खने मदु। छगू ला खनालया विकल्पय् मेम्ह मनू माओवादीयाके तयार मदु। खनाल धुंकाः गज्याःगु सरकार गठन जुइ धइगु खँ नं स्पष्ट मदु। आः यदि माओवादीया सुं नेता प्रधानमन्त्री जुल धाःसा वयागु लागिं खनालं थःगु पार्टीया समर्थन कया बी धइगु ग्यारेन्टी मदु। थ्व अवस्थाय् देश हानं छक्वः सरकारविहिन अवस्थाय् लानाः अन्यौलपूर्ण जुइगु खतरा दु। संविधानसभाया म्याद भदौ १४ गते तक जक दुगु सन्दर्भय् आः न्हूम्ह प्रधानमन्त्री ल्ययेगु अनिश्चित प्रक्रियाय् वनाच्वनेगु गुलित पाय्छि जुइ, व बिचाः यायेमाःगु पक्ष दु। थ्व इलय् न्हूम्ह प्रधानमन्त्री ल्ययेगु प्रक्रियाय् दुहां वनेगु धइगु भदौ १४ गतेया म्याद गुज्रे यायेगु व वयां लिपा तप्यंक हे संविधानसभा भंगया लँपुइ वनेगु सरह खः ।

More Stories Like this