मन्त्री थपया प्रस्ताव अस्वीकार
माओवादीया ज्या खनाः एमाले स्थायी समिति आक्रोशित
येँ (सन्ध्या टाइम्स)/वर्तमान सरकारया नेतृत्व यानाच्वंगु एमालें मन्त्रिमण्डल विस्तारया लागिं माओवादीं छ्वया हःगु प्रस्तावयात अस्वीकार याःगु दु ।
एमालेया थौं सुथय् च्वंगु स्थायी समितिया बैठकं माओवादीया उगु प्रस्तावयात अस्वीकार यायेगु निर्णय याःगु खः। पार्टीया केन्द्रीय ज्याकुथी च्वंगु उगु बैठकं न्यागू बुँदाया सहमति कार्यान्वयन नापं थीथी विषयय् सहलह जूगु खः ।
निघौ तक जूगु उगु बैठकं माओवादीपाखें कृष्णबहादुर महराययात लित सःताः नारायणकाजी श्रेष्ठया नेतृत्वय् सरकारय् न्हूगु टीम छ्वयेगु धकाः याःगु निर्णय संविधानसभाया म्याद थप याये न्ह्यः जूगु न्यागू बुँदाया सहमतिया अःखः खः धकाः नं ठहर याःगु दु। पार्टी दुनेया अन्तर संघर्ष मिले यायेत माओवादीं याःगु निर्णययात एमाले दुनेया माधव नेपाल व केपी ओली पक्षया नेतातय्सं आपत्ति प्वंकूगु खः ।
