पुनर्गठन मखु राजीनामा या: केपी ओली

येँ (सन्ध्या टाइम्स)/एमालेया वरिष्ठ नेता केपी ओलीं मुलुकयात यथास्थितिइ हे तया तयेगु नितिं मन्त्रिपरिषद् पुनर्गठनया प्रस्ताव हःगु खः धयादीगु दु। थुज्वःगु गतिविधिं मुलुकयात जक मखु प्रस्ताव हःपिंत नं फाइदा जुइ मखु धकाः नं वय्कलं धयादिल ।

एमालेया भातृ संगठन युवा संघया विदेश विभागया थौं येँय् जूगु छगू ज्याझ्वलय् ब्वति कयाः लिहां वयेगु झ्वलय् संचारकर्मीलिसे खँल्हासें नेता ओलीं थ्व खँ धयादीगु खः। वय्कलं मन्त्रिपरिषद्या पुनर्गठन मयासे प्रधानमन्त्री झलनाथ खनालं राजीनामा बीमाः धकाः नं धयादिल। प्रधानमन्त्री खनालं राजीनामा मबिसे संसद व राजनीतिक सहमतिया उपहास जुयाच्वंगु दु धासें जनतायात ठगे यायेगु प्रवृत्ति त्वःतेमाः धकाः नं वय्कलं धयादिल। वय्कलं धयादिल, 'ठगे यानाः मुलुक बने जुइ मखु, थुकिं सुयात नं हित याइ मखु, ठगे यायेगु प्रबृति त्वःतेमाः ।'

राजनीतिक सहमति कथं राष्ट्रिय सहमतिया सरकार दयेकेमाःगु थासय् मुलुकयात यथास्थितिइ तयाः जनतायात झंगः लायेगु ज्या जुयाच्वंगु दु धासें वय्कलं सहमति कार्यान्वयनय् बः बियादीगु दु ।