भौ-कायं दायाः नेता अस्पतालय्
येँ (सन्ध्या टाइम्स)/ब्यागलं च्वंगु झिदँ लिपा अंश दावी यासें काय् व भौ जानाः छम्ह कांग्रेसयात बाम्हसिक्क दाःगु दु। रुकुमया मुरु गाविसय् च्वंम्ह वीरबहादुर खड्का (५३ दँ) यात थःहे तःधीम्ह काय नरेन्द्र खड्का व भौ शकुन्तलां अस्पताल हे यंकेमायेक दाःगु खः। घाःपाः जूम्ह खड्का नेपाली कांग्रेस गाउँ इकाई समितिया सभापति खः। छेँय् हे च्वनाच्वंगु इलय् जूगु सामान्य विवादय् खड्कायात कायं कथि व भौनं इंचां दाःगु खः। उकी लानाः खड्काया छ्यनय् व नुगःपाय् बांमलाक घाः लाःगु दु। आः वय्कःयात सल्लेया जिल्ला अस्पतालया इमर्जेन्सी कक्षय् तयाः वासः यानाच्वंगु दु। अबुयात दाःम्ह काय व भौ धाःसा घटना लिपा बिसिउँ वंगुलिं आः उमित प्रहरीं मालाच्वंगु दु। झिदँ न्ह्यः हे अंशबन्डा जुइधुंकूसां उमि दथुइ अंशया ल्वापु जुया वयाच्वंगु खँ धाःगु दु ।
