जिविस प्रतिनिधियात थेच्वं तुं लित छ्वया हल

यल (सन्ध्या टाइम्स)/सरकारं न्हूगु नगरपालिका घोषणा याःगु चम्पापुरया सीमा, वडा विभाजन व ज्याकू बारे फिल्ड निरीक्षण याःवःपिं जिल्ला विकासया प्रतिनिधितय्त थेच्वया स्थानीय जनतां लँय् हे पनाः लित छ्वया बिउगु दु। म्हिगः जिल्ला विकास समितिया प्रतिनिधि नापं राजनीतिक दलया प्रतिनिधित नं थेच्व जुयाः झरुवारासी वनेत्यंगु इलय् लँय् हे पियाच्वंपिं न्यय्म्ह ति स्थानीय मनूतय्सं उमिगु गाडी पनाः गबलय् तक थेच्वयात नगरपालिकाय् दुथ्याकीमखु अबलय् तक मेगु छुं नं ज्या याये दइ मखु धासें उखें तुं लित छ्वया बिउगु खः। स्थानीय मनूतय्सं 'थेच्वया नेवाःतय्गुपाखें' इमित ज्ञापन पौ नं लःल्हाःगु खः। नेपाली कांग्रेस यल जिल्ला समितिं आधिकारिक रुपं हे थेच्वयात नगरपालिकाय् दुथ्याकेमाः धकाः निर्णय यायेधुंकूगु दुसा आः मेमेगु दलयात नं अथे हे निर्णय यायेत नं स्थानीय मनूतय्सं दबाव बियाच्वंगु दु। वंगु आइतवाः थेच्वया सर्वदलीय समिति नापं नागरिक समाजं थेच्वयात नगरपालिकाय् दुथ्याकेमाःगु माग यासें जिल्ला विकास समितिइ ज्ञापन पौ लःल्हाःगु खः। थःपिनि माग पूरा मजुल धाःसा सतकय् कुहां वयेगु बाहेक मेगु विकल्प मदइगु ख्याच्वः नं स्थानीय मनूतय्सं जिविसयात बिउगु दु ।