मंकाः संघर्ष समितिया भावी ज्याझ्वः बारे अन्तर्क्रिया
येँ (सन्ध्या टाइम्स)/ नेवाः स्वायत्त राज्य मंकाः संघर्ष समितिया ग्वसालय् वंगु शनिवाः छगू सहलह मुँज्या जुल। पर्यटन बोर्ड नेपालय् जूगु गु मुँज्याय् संविधान निर्माणया ई म्ह्वः हे जक दनिगु इलय् नेवाःतय्सं गुकथं दवाब बिइगु व उगु इलय् नेवाःतय्सं छु छु ज्या यायेमाः धइगु विषयलय् सहलह जूगु खः। वर्तमान संघर्ष समितिया नायः बाबुराजा बज्राचार्यं आःतक संघर्ष समितिं यानावयाच्वंगु ज्याया बारे जानकारी बियादिल। समितिया संरक्षक मल्ल के. सुन्दरं राजनैतिक विश्लेषणनापं भावी योजनाया विषययात कयाः जानकारी बियादीगु खः। नेपाः राष्ट्रिय पार्टीया नायः डा. केशवमान शाक्यं संविधानसभाया दुने दक्व नेवाः सभासद्त छप्पं जुयाः दवाब मूलक ज्या मयायेकं संघर्ष समितिं जक पिनेच्वनाः न्ह्याक्व ज्या याःसां सफल जुइत थाकुइ, धयादिल। ज्याझ्वलय् नेपालभाषा मंकाः खलःया नायः पद्मरत्न तुलाधर, प्रा. माणिकलाल श्रेष्ठ, डा. महेशमान श्रेष्ठ, भिमसेनदास प्रधान, पलाञ्चोक, किपू, तोखालगायत आपालं थासं वःपिं प्रतिनिधिपिंसं नं थःथःगु समस्या तयेगु नापं सुझाव नं बियादीगु खः। ज्याझ्वलय् संघर्ष समितिया झिगू घटकया नायःपिनिगु नं उपस्थिति दुगु खः ।
मुँज्यां आः वइगु २३ गते राजनैतिक पार्टीया नेतातय्त समेत ब्वनाः छगू अन्तर्क्रिया ज्याझ्वः यानाः भावी योजना तयार यायेगु निर्णय याःगु दु। समितिया नायः बाबुराजा बज्राचार्यया सभापतित्वय् न्ह्याःगु उगु ज्याझ्वलय् डा. चुन्दा बज्राचार्यं लसकुस यानादीगु खः ।
