माओवादीया विवाद समाधान जूगु खत?

संसदया दकलय् तःधंगु जक मखु देशय् न्ह्यानाच्वंगु शान्ति प्रक्रिया व संविधान निर्माण प्रक्रियाया दकलय् प्रमुख घटक जुयाच्वंगु पार्टी एनेकपा (माओवादी) दुने ब्वलंगु आन्तरिक कचवं समाधान यायेगु नामय् सरकारया टीम परिवर्तन यायेगु निर्णय जूगु दु। उकिया नापं अध्यक्ष प्रचण्ड प्रति असन्तुष्ट जुयाच्वंपिं उपाध्यक्ष लगायत मेमेपिं पदाधिकारीतय्त नं थीथी जिम्मेवारी बियाः पार्टीइ कायम विवाद समाधान यायेगु ज्या जूगु दु। थ्व जिम्मेवारी बाँडफाँडयात सकलें नेतातय्सं स्वीकार याःगु दुसा थुकिं यानाः अध्यक्षयाके जक निहित जुयाच्वंगु शक्ति आः मेमेपिं नेतातय्त नं इनेगु ज्या जूगु दु। पार्टी बहुपदीय प्रणालीइ वनेगु धायेधुंकाः पदय् दुपिं सकसितं जिम्मेवारी बीमाःगु अनिवार्य खः गुगु मजूगुलिं हे माओवादी मुलुकया इतिहासय् हे दकलय् संगीन ई धाःगु थ्व घडीइ थ्यंकाः विवादया तचाःगु चाकलय् लाः वःगु खः। अथे खःसां पद व जिम्मेवारी इनाः पार्टीं थ्व विवाद यदि धाथें समाधान जूगु खःसा उकियात सकारात्मक रुपं हे काये माली। थ्व ई माओवादी थेंज्याःगु शान्ति प्रक्रियाया छगू मुक्कं पक्ष जुयाच्वंगु पार्टी थज्याःगु विवादय् लानाच्वनेगु स्वस्थकर नं मखु। उगु पार्टीइ थौंकन्हय् सरकारय् वनेगु, अले वंसां थःत फलाना मन्त्रालय हे माः धइथेंज्याःगु चाहना नं गुलिखे नेतातय्के विकास जुया वःगु खँ लिपांगु घटनातय्सं क्यनाच्वंगु दु। यदि थ्व ल्वय् मेमेपिं नेतातय्के नं सरे जुया वन धाःसा माओवादीया विवाद आः नं समाधान जुल धाये फइगु अवस्था मदु। पदया लोभं क्यनीगु थेंज्याःगु 'क्रोनिक' ल्वय् मेगु मदु। माओवादीया 'त्यागी' नेतात थुकिं मुक्त जुइमाः ।

More Stories Like this