बलिया दुगुचा

नर्मदेश्वर प्रधान

खँयाखँय्
६०१ म्ह सभासद। इमि अन्त्येष्टि जुइ। श्राद्ध याइ। लय् लय्। थीथी तीर्थय् वनी। ६०१ सभासदतय् नामय् क्रियापुत्रीं पिण्ड बी। सभासदत धात्थें सीगु मखु। देशया विकराल राजनीति परिस्थिति। ६०१ म्ह सभासदतय् अकर्मण्यता। उकिया विरोध जुइ। असन्तोष अभिव्यक्त जुइ। कर्तव्यं च्यूत सभासदतय् कारणं देशया बेहाल जुइ। थ्वं दुःख सी। देश अनिश्चितताया घोर अन्धकारय् तनी। जनताया नुगलय् आक्रोश दनी। सासः ल्हानाः म्वानाच्वपिं सभासदत। जनताया मिखाय् सीपिं बरोबर जुइ। निष्क्रिय। निष्प्राण। बुँख्याःचा थें। लय्लय् तलब माकुक स्याइ। जिक्व सुविधा काइ। देश जनताया निंतिं छुं यायेम्वाः। याइ मखु। छुं याइ। आश शून्य जुइ। सभासदत अधिकांश प्यादा खः। पार्टी नेतातय् ल्हातिइ। नेतातय्सं इमित गुकथं म्हितकी, संकी, चाःहीकी। प्यादा सभासदत उकथं हे सनी। थुपिं धात्थें म्वानाच्वंगु दु। प्राणवान खः। बिचाः यायेगु गलत जुइ। थुपिं सी। प्रेत जुल। गुलिस्यां अनुमान याइ। देश सभासदतय् भूतात्मा, प्रेतात्मां आक्रान्त जुइ। देशयात सिकं थी। सीताङ्गं ग्रष्ट जुइ। देश झं झं गले जुइ ।

सभासदतय् शवयात्रा। इमि अन्त्येष्टि। काजक्रिया। श्राद्ध। थ्व जनताया आक्रोशया छुमा खः। प्रतिकात्मक विरोध। तर न्ह्याक्व हे आक्रोश प्वंकि। विरोध या। प्रभाव छु निं छु जुइ। पाषाण सभासदतय्त छुं जुइ मखु। अःखः सभासदतय्सं धाइ, "सार्कीं सा सीमा धायेवं सा सी ला? हालीपिं हालाच्वनी। म्हुतु मस्याःतले। म्हुतु स्याइ थः हे सुम्क च्वनी। सुनानं धायेवं जनताया प्रतिनिधि सी मखु। गबलय् तक संविधानसभा दइ। सभासदत दइ। म्वाइ। जीवन्त जुइ। संविधान दयेकी। संविधानसभाया ज्या क्वचाइ। सभासदतय् ई फुइ। संविधान मदयेकूतले संविधानसभा दइ। ल्यनी। सभासदत नं दइ। सुनां पनी? सभासदतय्त संके फइ मखु।" सभासदतय्सं फूर्ति याइ। हाँक बी ।

ख नं खः। अन्न्येष्टिया नाटक यायेवं, पिण्ड बीवं सभासदत गनं शिथिल जुइ? क्रियापुत्री तीर्थ तीर्थय् वनी। थुमि नामय् तर्पण बी। श्राद्ध याइ। थुज्वःगु कर्मकाण्डं अःखः सभासदतय्त पुण्य लाइ। जय जुइ। म्वाःम्वाकं तरे जुइ। धाइ। पापीतय्त यमराजं ग्वाराग्वारा दायेकातःगु चिकनय् थुनी। सास्ती बी। तर्पण श्राद्धं अःखः दण्ड मखु पुण्य बी। तरे याइ। पापं मोचन जुइ। क्रुर अपराधीतय्त मृत्युदण्डं कसा सिद्ध जुइ मखु। बरु राहत जुइ। मृत्युदण्डं अपराधीतय्त मुक्ति बी। दण्डया अनुभूति जुइ मखु। अपराधीतय्त धात्थेंया दण्ड सी नं मफु, म्वाये नं मफुया स्थितिइ तयेगु जुइमाः। अपराधीतय्सं अले तिनि दण्ड धइगु छु सी। पाप छु चायेकी। सीगु अन्त्येष्टिया कल्पना यानाः दण्डित यानागु सन्तोष कायेगु। मन तयेगु फुस्लुगु ज्या जक जुइ। थुकिं दोषीतय् मनोबल थुने फइ मखु। तर सभासदतय् अन्त्येष्टि, श्राद्ध, काजक्रियाया अर्थशून्य धाये फइ मखु। थ्वया प्रतिकात्मक अर्थ गाक्कं दइ। मृततुल्य सभासदतप्रति जनताया गज्याःगु धारणा दु? थ्व क्रियां स्पष्ट याइ। थ्व जनताया नैतिक प्रहार खः। खः, लाज शरम मदुपिंत नैतिक प्रहारया छुं अर्थ दइ मखु। नांगापिं मनूत निर्लज्ज जुइ। इमिके मछाः धइगु दइ मखु। नांगा नाचे हजार दाउ। थौंया सभासदतय् नंगा नाचं थ्व खँ पुष्टि जुइ ।

निराश जुइ मजिउ। आशावादी जुइमाः। कन्हय् बांलाइ। आस्थावान जुइमाः। क्रान्ति वइ। उथलपुथल जुइ। हिउपाः वइ। क्रान्तिइ विश्वास यायेमाः। फुक्क ठीक जुइ। सुथां लाइ। आशावादीतय्सं धाइ। हावा तइ। खः। क्रान्ति जुइ। हिली। वल, वल......क्रान्ति। गुञ्जायमान जुइ। सर्गः थ्वइ। देशय् क्रान्ति जुइ। क्रान्ति वइ। क्रान्तिं शान्ति नाप लाइ। ल्हाः मिले याइ। घय्पुइ। ज्वः चिनी। ककटेल जुइ। क्रान्तिइ शान्तिया क्वाति। गुपुन्हि न्याइ। देश। थौं वर्णशंकरया स्थितिइ। राजनीतिं हिजडा रुप काइ। उभयलिङ्ग। अर्धनारेश्वर ।

बयोवृद्ध अर्थमन्त्रीं बजेट पेश यायगु न्हि क्वःछी। क्वःछिउगु न्हि कुुन्हु बजेट वइ मखु। कन्हय् कुन्हु वइ। बजेट वये छन्हु न्ह्यः हे बजेटया खँ फुक्कं ज्वइ। कय्ता ब्यनी। बजेटया गोप्यता भङ्ग जुइ। अर्थमन्त्रीं राजीनामा यायेमाः। नैतिकताया आधारय्। विरोधीतय्सं सः थ्वयेकी। अर्थमन्त्री ग्याइ मखु। वं छाती फुले याइ। धाइ। "जिं छाय् राजीनामा यायेगु? बजेटया गोप्यता भङ्ग जुइ। थुकी जि दोषी मखु। दोषी सिस्टम खः। सिस्टम हे झूर। जिगु छु दोष। जिं मखु। सिस्टमं फयेमाः दोष। जिं छाय् राजीनामा बीगु?" चतुर वकिल अर्थमन्त्रीं थःगु पक्षय् वकालत याइ। वय्कःया अदालती पाराया बयान। आर्कषक। रकमी च्वछायेबह जुइ ।

सुनानं सुयातं दाइ। ल्हाः चले याइ। ल्हाः नःम्हं विरोध याइ। दाःम्हं थःत बचे याइ। धाइ। "जिं ल्हाः चले यानागु मखु। जिगु शरीरया सिस्टमं याःगु खः।" क्या मज्जागु बचावत ! वकिल अर्थमन्त्रीजुं लँ क्यनी। आत्मसुरक्षाया जुक्ति स्यनी। जनतां दुःख सियाच्वन। प्यखेरं सः थ्वइ। अर्थमन्त्रीं ताइ। धाइ "भगवान् बुद्धं धाःगु दु। संसार दुःखमय। दुःख विश्वप्रकृति सिस्टमया लिच्वः खः। जनताया दुःख मचीकू, जनतायात राहत मबिउ धयां छु याये? अर्थमन्त्री थ्व खँय् जिम्मेवार जुइ फइ मखु।" अर्थमन्त्रीया खँ न्यने। खँ त्याकेगु वय्कःया खुबी अनुकरणीय जुइ ।

थौं देशया दुरावस्था। संकटया खँय् सभासद। मन्त्रीत। नेतात सुं हे नं दोषी मखु। अर्थमन्त्रीया धापू लुमनी। दोषी ला सिस्टम खः। अर्थमन्त्रीया तर्क लुमनी। न्हाय्पनय् लिथ्वइ। सभासदतय् अन्त्येष्टि, श्राद्ध, काजक्रिया यानां छु याये? वय्कःपिं दोषी मखु। दोष ला सिस्टमया खः। वकिल अर्थमन्त्रीया वकालत। न्हाय्पनय् थ्वया वइ। श्राद्ध ला सिस्टमया यायेमाः। अन्त्येष्टि ला सिस्टमया जुइमाः। जिपिं अपराधी मखु। देशया सिस्टम स्वय्म दोषी। अर्थमन्त्रीया वकालत लुमनी ।

अर्थमन्त्रीजु ! छिं दोषी खंकागु सिस्टम धाःगु छु खः? व थन सुनां हःगु? थुकिया जिम्मेवार सु? सिस्टमयात दोष बियाः मनय् लू थे धायेगु, यायेगु थ्व छितः छुट दयेफु तर अपराधया सातखटं मुक्त जुइ फइ ला? सिस्टमयात बलिया दुगुचा याये दइ ला?

More Stories Like this