८५ क्यन कुमार भन्त
त्रिपिटकाचार्या भिक्षु कुमार काश्यप महास्थविरया ८५ दँ बुन्हि येँया बुद्ध विहारय् तःजिक न्यायेकल। उसाँय् मदुगुलिं वसपोलं वंगु छुं न्हि न्ह्यवंनिसें उगु हे विहारय् च्वनाबिज्यानाच्वंगु खः ।
बुन्हि ज्याझ्वलय् संघ उपनायक भिक्षु अश्वघोष महास्थविरं कुमार भन्तें बुद्ध धर्मया माध्यमं नेपाली समाजय् बियाबिज्याःगु योगदानया चर्चा यानाबिज्यात। भिक्षु ञाणपुर्णिक महास्थविरं कुमार भन्तें नेपालय् त्रिपिटक प्रचारय् यानाबिज्याःगु ज्याया बारे कनाबिज्यात।
भिक्षु मैत्री महास्थविरं नेपालय् त्रिपिटक ग्रन्थ च्वज्याय् यानाबिज्याःगु योगदानया चर्चा यासें उज्वःम्ह मनूया सही कदर मजूगु बिचाः प्वंकाबिज्यात ।
बुद्ध विहारया भिक्षु कोण्डन्यं नेपालय् बुद्ध शासन धिसिलाकेगु ज्याय् राणाकालंनिसें आः तक नं उलि हे योगदान बियाच्वंगु खँ कनाबिज्यात। उगु इलय् भिक्षु कुमार काश्यपं थःगु बुन्हिया लसताय् भिक्षु संघयात चिवर दान बियाबिज्यात। लिसें अन परित्राण, ज्ञानमाला भजन खलः स्वयम्भूपाखें ज्ञानमाला भजन, बुद्ध पुजा, दान, प्रवचन आदि नं जूगु खः । राणाकालय् देशं पितिनाछ्वःपिं न्याम्ह थेरवादी भिक्षुत मध्ये आः तक जीवित दनिम्ह वसपोल हे छम्ह जक खः ।
