प्रधानमन्त्री खनाल असन्तुष्ट

थौं हे सपथ ग्रहणया तयारी

येँ (सन्ध्या टाइम्स)/माओवादीं उपप्रधान नापं गृहमन्त्री कृष्णबहादुर महरायात लित सःताः वय्कःया थासय् नारायणकाजी श्रेष्ठ प्रकाशया नेतृत्वय् न्हूगु हे पुचः सरकारय् छ्वयेगु धकाः याःगु निर्णयपाखें प्रम झलनाथ खनाल रुष्ट जुयादीगु दु। थौं सुथय् वालुवाटारय् न्हू मन्त्री जुइपिनि नांधलः बिउवंम्ह माओवादी अध्यक्ष प्रचण्डयात प्रम खनालं थ्व असन्तुष्टि प्वंकादीगु खः ।

स्रोतं धाः कथं अध्यक्ष प्रचण्डयात प्रम खनालं 'जिगु हे पार्टी एमाले दुने व प्रमुख प्रतिपक्षी नेपाली कांग्रेसं न्यागू बुँदे सहमति कथं सरकारया राजीनामा फ्वनाच्वंगु इलय् छिकपिंसं सरकारय् न्हूगु टीम छ्वया हयेगु धकाः निर्णय याःगुलिं जितः ज्या मछिन' धयादीगु खः ।

प्रम खनालया लिसः बिसें अध्यक्ष प्रचण्डं पार्टी दुने ब्वलंगु गुटबन्दी अन्त्य यायेत थम्हं थ्व निर्णय यायेमाःगु खः धयादिल। माओवादीं थःगु भागय् लाःगु मन्त्रीत मध्ये नारायणकाजी श्रेष्ठ प्रकाशयात उपप्रधान नापं गृहमन्त्री दयेकाः १२ म्ह मन्त्री व १२ म्ह राज्यमन्त्रीया धलः प्रमयात बिउगु खः। न्हूपिं मन्त्रीतय्त थौं हे सपथ ग्रहण याकेत नं प्रचण्डं इनाप यानादीगु खःसा लिसलय् प्रम खनालं उकिया निंतिं राष्ट्रपतिलिसे परामर्श यानाः फयांफछि थौं बहनी तकया दुने हे सपथ ग्रहण याकेगु बचं बियादीगु दु ।

उखे एमालेया वरिष्ठ नेता माधव नेपाल व केपी ओलीं धाःसा न्यागू बुँदाया सहमति कथं सरकारं राजीनामा बीमाःगु इलय् षडयन्त्रपूर्वक माओवादीं न्हूगु टीम सरकारय् छ्वया हःगु धइगु वर्तमान सरकारयात हे निरन्तरता बीगु कुतः खः धकाः आपत्ति प्वंकूगु दु ।

थौं हे मन्त्री क्वाटर त्वःतीगु
पार्टीया केन्द्रीय कमिटीं लित सःतेगु निर्णय यायेवं एकीकृत माओवादीया मन्त्रीतय्सं थौं हे मन्त्री क्वार्टर त्वःतीगु जूगु दु। वय्कःपिंसं थौं सुथंनिसें हे मन्त्री क्वार्टर त्वःतेगु तयारी यानादीगु खँ सीदुगु दु ।

उपप्रधान नापं गृहमन्त्री कृष्णबहादुर महरा व सञ्चारमन्त्री अग्नि सापकोटां थौं सनिलय् तकया दुने मन्त्री क्वाटर त्वःतेगु तयारी यानादीगु दु। युवा तथा खेलकुद मन्त्री हितबहादुर तामाङ, शान्ति तथा पुनःनिर्माणमन्त्री विश्वनाथ साह धाःसा मन्त्री क्वाटर मदयाः पिने हे बालं च्वनादीपिं जुयाः वय्कःपिंत क्वाटर त्वःतेमाःगु झन्झट मंत ।

उपप्रधान नापं गृहमन्त्री महराया प्रेस संयोजक मनोज घर्तीं कनादी कथं उपप्रम महरां थौं हे सरकारी क्वाटर त्वःतादीत्यंगु दु। महराया सामान थौं सुथंनिसें हे मिले यायेगु ज्या जुयाच्वंगु दु। भाजु महरा मन्त्री क्वाटरं पिहां वयाः पेप्सीकोलाया पुलांगु हे छेँय् च्वं वनीगु जूगु दु। अथे हे सञ्चारमन्त्री सापकोटां नं थौं हे क्वाटर त्वःतीगु खँ वय्कःया काय दीपक सापकोटां कनादिल। मन्त्री जुइ न्ह्यः बानेश्वरहाइटय् च्वनादीम्ह सापकोटा आः कोटेश्वर वा यलय् च्वं वनेत्यंगु दु। सरकार त्वःतीपिं माओवादी मन्त्रीत थौं अन्तिम न्हि कथं मन्त्रालयय् वनेत्यंगु दु। थःपिं सम्बद्ध मन्त्रालयय् थौं हे अनया कर्मचारीतय्सं वय्कःपिंत विदाइ कार्यक्रम यायेगु तयारी जुयाच्वंगु खँ नं सीदुगु दु। न्हूपिं मन्त्रीत मन्त्रालय वइ न्हि धाःसा अझं क्वःछिउगु मदुनि ।