मन्त्रालयतय् नामय् प्राधिकरणया सुचं
येँ (सन्ध्या टाइम्स)/न्ह्याक्व ताकेता याःसां नेपाल सरकार अन्तर्गतया थीथी मन्त्रालयतय्सं ध्यबा पू हे मवःगुलिं कायल जुयाः नेपाल विद्युत प्राधिकरणं अन्ततः पत्रिकाय् हे विज्ञापन पिकयाः सरकार मातहतया २१ गू मन्त्रालयया नामय् सार्वजनिक सूचना जारी याःगु दु ।
प्राधिकरणं थौं छगू न्हिपती सुचं पिकासें २१ गू मन्त्रालयतय्सं मुक्कं यानाः ६६ करोड २४ लाख २४ हजार १२ तका ५० पैसा दां १५ न्हुया दुने पू वा धकाः इनाप याःगु दु। यदि १५ न्हुया दुने सम्बद्ध मन्त्रालयतय्सं ध्यबा पूमवल धाःसा फुक्क हे मन्त्रालयय् विद्युत लाइन काटे यायेमाली धकाः नं सुचनय् चेतावनी बियातःगु दु ।
प्राधिकरणं जारी याःगु सुचं कथं मत च्याकाः नं ध्यबा मपुसे च्वनाच्वंगु मन्त्रालयत मध्ये दकलय् च्वय् गृह मन्त्रालयया नां लानाच्वंगु दु। गृह मन्त्रालयं प्राधिकरणयात १७ करोड ५० लाख ५६ हजार १०० तका दां पुले मानि। वयां क्वय् स्वास्थ्य मन्त्रालयया नां दु ।
स्वास्थ्यं १५ करोड २१ लाख ७४ हजार २५० तका पुले मानि। अथे हे शान्ति तथा पुनर्निर्माण मन्त्रालयं १३ करोड ६४ लाख ५ हजार ९०० तका पुले मानि। दकलय् कम ध्यबा पुलेमाःगु निकाय जुयाच्वंगु न्यायपालिका तथा संवैधानिक अंगतय्सं हे १ लाख ७१२ तका पुले मानि। प्राधिकरणं थ्व निकायतय्त तःक्वःमछि हे पौ च्वयाः नं लिसः मवःगुलिं थथे सुचं पिकाःगु खः ।
