बलात्कृत भिक्षुणीयात थीथी संस्थापाखें ग्वाहालि
येँ (सन्ध्या टाइम्स)/बलात्कारया शिकार जूम्ह भिक्षुणी फुलमाया तामांग (नां हिलागु) यात थीथी संघ संस्थातय्सं आर्थिक ग्वाहालि याइगु जूगु दु। लिसें वय्कःयात हानं भिक्षुणी जीवनय् तुं प्रवेश याके बीत थीथी संस्थातय्त पौ च्वयेगु निर्णय नं याःगु दु ।
शाक्यधिता नेपाल च्याप्टरया ग्वसालय् म्हिगः थनया धर्मकीर्ति विहारय् थुगु विषययात कयाः जूगु सहलह ज्याझ्वलं थ्व निर्णय याःगु खः। थ्व फुक्कं ज्याया निंतिं अखिल हिमाली बौद्ध संघ, धर्मकीर्ति विहार व महिला बौद्ध समूहपाखें ग्वाहालि यायेगु नं निर्णय जूगु दु ।
धर्मकीर्तिया इन्दावती गुरुमांया पहलय् जूगु उगु अन्तर्क्रियाय् बिचाः तयादीपिं थीथी वक्तातय्सं उगु घटनाया दोषीतय्त कारवाही यायेमाःगु, लिपा लिपा अज्याःगु घटना मजुइकेत सम्बद्ध निकायतय्त इनाप यायेगु, पीडित आनीयात संरक्षण बीमाःगु आदि विषयय् सहलह ब्याकूगु खः। ज्याझ्वलय् शाक्यधिता नेपाल च्याप्टरयात दर्ता यायेगु बारे नं सहलह जूगु खः ।
