कमला गुरुमांया तःजिक अभिनन्दन
कमला गुरुमां प्रव्रजित जुयाबिज्याःगु न्यय्दँय् क्यंगु लसताय् शनिवाः छगू तःजिगु ज्याझ्वः जुल। ज्याझ्वलय् वसपोलयात बौद्ध धर्म सम्बन्धी थीथी संस्थापाखें अभिनन्दन यायेगु ज्या नं जूगु खः ।
भिक्षु ज्ञानपुर्णिक महास्थविरया सभापतित्वय् जूगु उगु ज्याझ्फ्वलय् मूपाहां कथं अखिल नेपाल भिक्षु महासंघया नायः भिक्षु बोधिसेन महास्थविर बिज्याःगु खःसा उपसंघनायक भिक्षु अश्वघोष महास्थविर समक्ष पंचशील प्रार्थना यानाः ज्याझ्वः न्ह्याकूगु खः ।
ज्याझ्वलय् अभिनन्दित व्यक्तित्व कमला गुरुमांपाखें नं प्रवचन बियाबिज्याःगु खः। उगु इलय् वसपोलं थःत याःगु अभिनन्दनप्रति लसता प्वंकुसें देशय् बुद्ध शासन चिरस्थायी यायेत सकलें जानाः ज्या यायेमाःगु खँय् बः बियाबिज्यात ।
करुणावती गुरुमांपाखें लसकुस याःगु उगु ज्याझ्वलय् रीना तुलाधरं कमला गुरुमांया म्हसीका बियादीगु खः। ज्याझ्वः कमला गुरुमां प्रव्रज्याया ५० दँ समारोह समितिया ग्वसालय् जूगु खःसा उकिया हे जः तुल्सीदास मानन्धरं सुभाय् बियादीगु खः ।
उगु ज्याझ्वलय् अखिल नेपाल भिक्षुणी संघपाखें अध्यक्ष ज्ञाणशिला गुरुमांनं कमला गुरुमांयात अभिनन्दनपौ लःल्हानाबिज्याःगु खःसा आपालं बौद्ध संघ-संस्था व व्यक्ति विशेषं नं अभिनन्दन पौ व थीथी देछा देछाःगु खः ।
