एमालेया धौख्यः भेलां बिउगु निराश सन्देश

पार्टी दुने थवंथवय्या कवचं मदयेकाः दुगु विवादत समाधान याना वनेगु ताः तयाः सत्तारुढ पार्टी नेकपा (एमालें) धौख्यलय् सःतूगु न्ह्यलुवा कार्यकर्ता भेलां मदु मदुगु विवाद सिर्जना यानाः पार्टी स्पष्ट रुपं हे निगू धारय् वनेधुंकूगु संकेत बिउगु दु। भेलाया उलेज्यांनिसें हे पार्टीया शीर्ष नेतातय्सं थःथःगु धारया प्रचार यानाः एमाले थौंया इलय् छधी मदुगु सन्देश कार्यकर्तायात बिउगु दु। उकी छगू धार प्रधानमन्त्री एवं पार्टी अध्यक्ष झलनाथ खनालं ज्वंगु दुसा मेगु धार एमाले अधिवेशनय् पराजित जूपिं माधव नेपाल�खड्ग ओली पुचलं ज्वनाच्वंगु दु। झलनाथ खनाल वंगु संविधानसभाया चुनावय् नं त्याःम्ह व महाधिवेशन नं त्याकूम्ह नेता जूगु कारणं वय्कःयाके बिस्कं कथंया फुर्ति दुसा माधव-ओली पुचः संविधानसभाया चुनाव व पार्टी महाधिवेशन नितां बूगु जूगुलिं उमिके छगू कथंया कुण्ठां थाय् कयाच्वंगु दु। निगुलिं गुटं थवंथवय् याइगु अभिव्यक्तिं थुकिया संकेत मबिउगु मखु। भेलाय् शीर्ष नेतातय्सं प्वंकाच्वंगु थज्याःगु अभिव्यक्तिं यानाः उगु भेला कार्यकर्ताया दथुइ पार्टी विभाजित मनस्थितिइ दु न्हां धइगु निराशाजनक सन्देश बियाः क्वचाइगु खः लाकि धइगु ग्याःचिकु ब्वलंगु दु। भेलाजःछि निगुलिं गुटया नेतात थःथःगु गुटया बिस्कं बिस्कं मुँज्याय् व्यस्त जुयाच्वंगु खनेदुगुलिं नं थ्व खँयात पुष्टि यायेत हे बः बी। वैधानिक ल्याखं थ्व छुं निर्णय हे याना वनेगु भेला ला मखु। तर भेलाय् शीर्ष नेतातय्सं क्यनाच्वंगु रवैयां न्ह्यलुवा कार्यकर्तात छगू बांमलाःगु सन्देश ज्वनाः जिल्ला लिहां वनीगु बाहेक थुकिं मेगु छुं हे उपलब्धी चूलाकीगु सम्भावना धाःसा मदु ।

More Stories Like this