मिखां मखंसां छुं मपाः

कृष्ण प्रजापति

धुँसिँ शाक्य ख्वपया बेखाय् च्वंम्ह मिखा मखंम्ह ब्यक्तित्व। व बुयाः निला दुबलय् हे छुं वयागु मिखा नया बिउगु जुयाच्वन। छगः मिखा छुं नःगु न्हय्ला लिपा हाकनं मेगु मिखा नं छुं नयेवं धुँ सिँ जिवंकाछि हे मिखां मखंक म्वाये माःगु स्थिति जुल। अथे खःसां थौंकन्हय् न्यय्प्यदँय् क्यनाच्वंम्ह धुँ सिँ थःगु हे पौरखं जीवन न्ह्याकेत ताःलानाच्वंगु दु। मिखां मखंम्ह जूसां वय्कलं सयेकातःगु थीथी सीप धाःसा सुं मिखां खंम्हेसित माथ यायेत तकं कुगाः। मिखां मखंम्हसां वय्कः सुकू थायेत धाःसा तसकं माहिर। तपाः सुकू, भ्वय् सुकू, चाकलाः सुकू वय्कलं बांलाक हे थायेसः ।

उकिया नापं धकि, दाला, पिचा, प्लाष्टिकया मलाचा, कप्चा, टीम्याट, धकिचा, कलालिं, किस्ति थेंज्याःगु ज्वलं नं वय्कं दयेके सः। वय्कलं मिखां मखंपिसं थियाः म्हिते फइगु कथंया छगू चेस बोर्ड व चेसया गट्टा नं तयार यानादीगु दु। गनं क्यने माल धाःसा थःगु नां देवनागरीं वय्कः थम्हं हे च्वये नं सः ।

मिखां मखं धकाः छेँय् जक च्वनेगु मखु, छुं सीप सयेकूसा थःत माःगु ज्या नं याये फइ धकाः वय्कःयात थज्याःगु ज्याखँ स्यनेकने यानादीम्ह धाःसा समाजसेवी भाजु रामबहादुर सिं भेले खः। भाजु भेलें शाक्ययात २०४३ सालं निसें म्हसि उगु खःसां वय्कः यात छेँनं पिहां वनेगु अनुमति मदुगुलिं छुं स्यने मखन। लिपा वय्कःया बौ मदयेधुंकाः वय्कः छेँनं पिहां वयेगु नं सुरु जुल ।

गुरु भेलेपाखें सयेकूगु सीपपाखें धुँसिं थानादीगु ज्वलं पिने यंकाः मीगु ज्या धाःसा वय्कःया मां चन्द्रमाया शाक्यं यानादी। चय्दँ दुम्ह मां चन्द्रमायां कायं दयेकूगु ज्वलं उखेंथुखें यंकाः मियादी। थुकथं सीप सयेकाः मीगु ज्या नं जूगुलिं आः वय्कः छेँया बोझ मखु आय आर्जन याइम्ह दुजः जुयादीगु दु। थम्हं यानागु ज्याय् परिवारयात ग्वाहालि चूलाःगुलिं वय्कलं छुं ई युगविजय पुस्तकालयय् वनाः बाह्रखरी च्वयेगु नं सयेकादीगु खः ।

थः म्वानाच्वनागु संसार गथे च्वं, वय्कलं मखं। अथे खःसां थ्व संसारय् सुथ जूगु व बहनी जूगु धाःसा वय्कलं चायेकेफु। गबलें गबलें द्यनेबलय् लाखें वय्कःयात न्हापा छेँय् हे म्हुकंचा सयेकागु ज्या म्हगसय् म्हनाच्वं हं। मांम्ह चन्द्रमायां कनादी कथं धुँसिँ निला दुबलय् छक्वः वयात याकःचा त्वःताः ख्वाः सिउ वंगु जुयाच्वन। लँय् वनाच्वँच्वं हे मचा तिसलं ख्वया हःगु तायाः ब्वाँय् वनाः स्वःवंबलय् छुं वयागु मिखा छगः नयेधुंकूगु जुयाच्वन। मिखां हि झ्वःझ्वः पिहां वयाच्वन। गुला लिपा हाकनं उकथं हे छुं मेगु छपा मिखा नं नया बीवं धुँसिँ पूर्णरुपं हे दृष्टिविहिन जूवंगु खः।
तःधिम्ह काय जूगुलिं ध्वनय् छाया तयाम्ह जूगुलिं वयागु नां 'ध्वँसिँ' जूवंगु खःसा मनूतय्सं धाःसां 'धुँसिँ' हे अप्वः धाइगु। धुँसिँ लिपा नं चन्द्रमायां मेम्ह छम्ह मचा बुइकूगु खः। तर व याकनं मदुगुलिं वय्कःपिनि मुक्कं ध्यान धुँसिँपाखे हे लाः वन। थौंकन्हय् वय्कःया न्याम्ह काय व छम्ह म्ह्याय् दी ।

२०१३ सालय् बूम्ह वय्कः २२-२३ साल तक ला थःगु चुक गल्लिइ जक हे न्यासि जुयाच्वनीगु खः। लिपा रामबहादुर सिं भेले नाप लायेधुंकाः ल्हासापाक्व ससुद्यइके तक न्यासि वनाः थ्यंकेधुंकूगु दु। अथेहे सांगाया १३१ फिट तःधिकःम्ह महाद्यः, बुंगय् च्वंम्ह बुंगद्यः, सात दोबाटोया स्वीमिङ पुल व धरहराया च्वय् तकं वय्कः थ्यंकादीगु दु।
परिवारय् बुँ मदुसां द्यःया ज्यां छुं भचा आम्दानी दुगुलिं खास हे आर्थिक समस्या मदु। मिखा मखंसां मिखां मखंम्ह थें गबलें मतायेकुसे खंपिंत अथें तयाः नं वं थीथी सामान काः जुइगु, स्वाहाने इरुथिरु याना जुइगु व पसः वनेगु तकं अःपुक यायेफु। यदि मिखां मखंम्ह जूसां वयात माःगु तालिम बिया वन धाःसा परिवारं वयात लहीगु मखु कि वं हे परिवार लहीगु स्थिति नं हयेफु धइगु दसु जुयाच्वंगु भाजु धुँसिँ महर्जन ।

More Stories Like this