बाबुराम न्हूम्ह प्रमया लाइनय्

बजेट पारित जुइवं सरकार हिलीगु सम्भावना

येँ (सन्ध्या टाइम्स)/एकीकृत माओवादी दुने ब्वलनाच्वंगु कचवं समाधान यायेगु झ्वलय् उगु पार्टीं आः राष्ट्रिय राजनीतिइ वयाच्वंगु समस्या नं नापनापं हे समाधान याना वनेगु निर्णय काःगु दु। उकिया लागिं आः प्रधानमन्त्री झलनाथ खनालं राजीनामा बीवं थः उपाध्यक्ष डा. बाबुराम भट्टराईयात न्हूम्ह प्रधानमन्त्री दयेकेगु धकाः निर्णय याःगुलिं कन्हय्या समस्या समेत समाधान जुइगु आशा खनेदुगु खः। डा. भट्टराईयात प्रधानमन्त्री दयेकेगु खँय् न्हापा मेम्ह उपाध्यक्ष मोहन वैद्यं विरोध यानाच्वंगु खःसा आः वैद्यलिसे हे गठबन्धन यानाः प्रधानमन्त्री दयेकेगु निर्णय याःगुलिं डा. भट्टराईया प्रम जुइगु लँपु पार्टी दुनें 'क्लियर' जूगु खँ सूत्रं धाःगु दु ।

डा. भट्टराईयात प्रधानमन्त्री दयेकागु वापत मोहन वैद्यं धाःसा पार्टीयात थःगु कब्जाय् लाके खनीगु जूगु दु। वय्कःयात पार्टीया शक्तिशाली संगठन विभाग प्रमुख दयेकेगु निर्णय माओवादीं याःगु दु। डा. बाबुराम भट्टराईयात प्रधानमन्त्री दयेकि धकाः नेपाली कांग्रेसं नं 'सुझाव' बीगु यानाच्वंगु व एमालेया नं माधव-ओली गुटं समर्थन याइगु सम्भावना दुगुलिं डा. भट्टराई नेतृत्वया सरकार बरु धाथें राष्ट्रिय सहमतिया सरकार जुइ फइगु आशा थन याना हःगु दु। यदि वय्कः प्रधानमन्त्री जुल धाःसा भारतलिसेया वय्कःया पुलांगु हे बांलाःगु स्वापुतिं यानाः भारतपाखें नं ग्वाहालि जुइगु आशा जुयाच्वंगु दु ।

थ्वहे झ्वलय् प्रधानमन्त्री झलनाथ खनालं सम्भवतः बजेट पारित जुइवं राजीनामा बीगु सम्भावना दुगु खँ विश्वस्त सूत्रं धाःगु दु। प्रम खनालं थ्व खँ माओवादी अध्यक्ष प्रचण्डयात नं धयादीधुंकूगु दुसा बजेट पारित जुइवं राजीनामा बीगु पूर्ण मनःस्थिति वय्कलं दयेका दीगु खँ धाःगु दु ।