दुने बन्द सत्र - पिने गुटया भेला
एमाले राष्ट्रिय भेला
येँ (सन्ध्या टाइम्स)/म्हिगःनिसें काभ्रेया धौख्यलय् न्ह्यानाच्वंगु एमालेया राष्ट्रिय प्रतिनिधि परिषद् भेलाया झ्वलय् थौं सुथंनिसें बन्द सत्र जुयाच्वंगु दुसा पिने धाःसा वरिष्ठ नेता केपी शर्मा ओलीं थःगु गुटया भेला याःगु दु। वय्कलं पार्टीया अध्यक्ष खनाल विरुद्ध छप्पँ जुया वनेत चिचीधंगु गुटया भेला हलं पिने यानादीगु खः ।
आः भेलाय् उपस्थित जूपिं नेता व कार्यकर्तातय्त गुंगू पुचः दयेकाः सुझाव कायेगु कथं बन्द सत्र जुयाच्वंगु दु।
थ्वहे झ्वलय् नेता ओलीं धाःसा पार्टी अध्यक्ष झलनाथ खनाल विरुद्ध १५ बुँदाया एजेण्डा तयार यानाः उकियात बन्द सत्रय् पेश यायेगु लागिं थः लिक्क लाःपिं नेता व कार्यकर्तातय्त निर्देशन बियादीगु दु। नेता ओलीं एकीकृत माओवादीयात गृह मन्त्रालय बिउगु, माओवादी एजेण्डाय् सरकार वंगु, नीति तथा कार्यक्रम व बजेटया सवालय् थःगु हे पार्टीया नेतातय्त उपेक्षा याःगु, मन्त्रिपरिषद् विस्तार मनोमानी ढंगं याःगु द्वपं बियाः अध्यक्ष विरुद्ध उगु एजेण्डा तयार यानादीगु खः ।
थौं बन्द सत्र जुइ न्ह्यः हे ओलीं उद्योग वाणिज्य संघया ज्यझ्वलय् ब्वति कयादीगु खःसा प्रम खनालं जनआन्दोलनय् घाःपाः जूम्ह मुकेश कायस्थयात नापलानादीगु खः। वइगु भदौ महिनाय् येँय् जुइगु राष्ट्रिय परिषद्या भेलाया नितिं एजेण्डा तयार यायेत नापं विधान संशोधन यायेगु नितिं सुझाव मुंकेत एमालें उगु भेला याःगु खः। म्हिगः उगु भेलाया उद्घाटन समारोहय् न्ववायेगु झ्वलय् एमालेया संस्थापन पक्ष व माधव-ओली पक्षं थःथःगु लाइनया खँ तयेगु नापं छगू पक्षं मेगु पक्षयात ध्याचू नकाः भाषण बीगु ज्या तकं याःगु खः ।
