नेवाः बाजं स्येनज्या समापन
स्वलायंक जूगु परम्परागत धिमे व बय् प्रशिक्षणया समापन ज्याझ्वः म्हिगः जुल। नेपाल आदर्श मा.वि. इ नेवाः बाजं स्यनेकुथिया ग्वसालय् जूगु उगु ज्याझ्वलय् मूपाहां सर्वोत्तम डंगोलं प्रशिक्षार्थीपिंत दसिपौ लःल्हानादीगु खः। वय्कलं परम्परागत बाजं धइगु पेशाया रुपय् मवँसे आस्थाया रुपय् वंसा स्थायित्व बी फइगु विचाः प्वंकादिल। थुकिया आर्थिक ग्वाहालिया निंतिं कतःया भरय् मच्वँसे थम्हं हे विकास जुयावनेमाःगु विचाः नं वय्कलं प्वंकादिल ।
प्रशिक्षक धर्म मुनिकारं नेवाः बाजंया बोल थीथी थासय् पानाच्वंगुयात छगू हे रुपय् हयेगु नं थुगु प्रशिक्षणया मू आज्जु खः धयादिल। थुकियालिसें न्हून्हूगु बोल सिर्जना यानाः लिपिबद्ध यायेगु कुतः नं जुयाच्वंगु जानकारी वय्कलं बियादिल ।
प्रशिक्षणय् बय्पाखे झिम्ह व धिमेपाखे नीखुम्हेसिनं ब्वति काःगु खःसा इमिसं हे बय् व धिमे थानाः नं क्यंगु खः। ज्याझ्वलय् मोहनकृष्ण डंगोल, मल्ल के. सुन्दर, बाबुराजा बज्राचार्य, नरेश ताम्राकार, रत्नकाजी महर्जनपिंसं नं नुगःखँ प्वंकादीगु खः ।
ज्यापु महागुथिया नायः विपेन्द्र महर्जनया सभापतित्वय् न्ह्याःगु उगु ज्याझ्वलय् प्रबोध कसां लसकुस यानादीगु खः। ज्याझ्वलय् उपस्थित पाहांपिंसं प्रशिक्षार्थीतय्सं नेवाः भासं खँ मल्हाःगु खँय् चिउताः नं प्वंकादीगु खः ।
