शान्त देय् नर्वेय् जूगु आतंकवादी हमला

युरोपया दकलय् शान्त व समृद्ध देश धकाः नांजाःगु नर्वेय् वंगु निन्हु लगायत बम विष्फोट व गोली प्रहारय् लानाः करिब सछिम्ह मनूया ज्यान वंगु समाचार वःगु दु। उकी मध्ये छगू बम विष्फोटया घटना स्वयम प्रधानमन्त्रीया ज्याकुथी हे जूगुलिं थुकियात अझ गम्भीर रुपं कायेमाःगु अवस्था जुया बिउगु दु। युरोपया मेमेगु देय्या तुलनाय् नर्वे तसकं शान्तगु मुलुकया रुपय् कायेगु याः। गबलें गबलें नोवेल सिरपाः बीगु ज्याय् धाँधली जुल धकाः चाहिं नर्वे सरकारया समेत आलोचना अन्तर्राष्ट्रिय ख्यलय् जुइगु याः। थ्व बाहेक संसारया गुगुं नं देय्या आन्तरिक मामिलाय् हस्तक्षेप मयाइगु देय् जूगु कारणं नर्वेयात अमेरिका, बेलायत आदि देय्यात थें सुनां नं आक्रमण याइ धकाः ग्यायेमाःगु खास कारण मदु। अज्याःगु शान्त थासय् वयाः याःगु थ्व आक्रमण निश्चय नं निन्दनीय खः। आक्रमणय् तालिवान अथवा अल कायदाया ल्हाः दयेमाः धकाः आशंका यानातःगु दु। यदि खःसा थ्व अवश्य नं बिन लादेनयात स्याःगु घटनायात कयाः उमिसं बिउगु लिसः जुइमाः। अल कायदां उकिया लिसः छुं कथं बी जुइ धकाः अनुमान ला जुयाच्वंगु खः। तर नर्वे थेंज्याःगु शान्त देशय् वनाः बी धकाः धाःसा सुनां नं अनुमान याःगु मखु ।

नर्वेय् जूगु थ्व आक्रमणं बिन लादेनया हत्या लिपा विश्वं आतकंवाद निर्मूल जुइ धकाः याःगु अनुमानयात धाःसा झुठ साबित याना बिउगु दु। बरु अःखतं आः संसारया छुं नं देय् आतंकवादी मुक्त मखु धइगु सन्देश थुकिं बीत स्वःगु दु। आतंकवाद विरुद्ध ल्वायेगु धकाः कस्से जुयाच्वंगु देय्तय् लागिं थ्व अवश्य नं चिन्ताया विषय खः ।

More Stories Like this