शाक्य मांभाय् पुचःया न्हूम्ह नायः

मांभाय् पुचः यलया छगू ज्याझ्वःया दथुइ थौं न्हूधाः जुल । ज्यासना पुचःया न्हूधाः कथं विजय शाक्य नायः, रामहरि कपाली छ्यान्जे व रत्नमान शाक्य दांभरि जुयादीगु दु । अथेहे दुजलय् हिराकाजी महर्जन, हेरारत्न शाक्य, मित्रुराज शाक्य सुशिल महर्जन, श्याम महर्जन व राजाराम वाद्यकार च्वनादीगु दु ।

ज्याझ्वलय् पुचःया सल्लाहकार नापं नेपालभाषा एकेदमिया चान्सलर सत्यमोहन जोशीं पुचःपाखें याना वयाच्वंगु ज्याझ्वःयात च्वछानादिसें पुचलं दँय्दसं मस्तय्त नेपालभाषाय् नुगः क्वसायेकेगु कथं याना वयाच्वंगु साहित्यिक धेंधें बल्लाकासा छुं दँनिसें दिनाच्वंगुलिं दुःख प्वंकादिल । वय्कलं नेपालभाषा एकेदमिपाखें न्ह्याका वयाचवंगु नेवाः एफ.एम.यात सकल नेवाःतय्सं ग्वाहालि यायेमाःगु बिचाः तयादिल । ज्याझ्वलय् सल्लाहकार डा. पुष्पराज राजकर्णिकार, नेपालभाषा मंकाः खलःया पुलांम्ह नायः नापं सल्लाहकार जुलुमलाल चित्रकारं नुगः खँ प्वंकादिल ।

थ्वहे झ्वलय् नेपालभाषाया ख्यलय् ज्या याना वयाच्वंगु मां भाय् पुचःपाखें थ्वहे वइगु श्रावण १४ गते शनिवाः झिक्वःगु धर्मादित्य धर्माचार्य सिरपाः च्वमि नानीभाई मिखाद्वंमियात बीत्यंगु नं जानकारी बिउगु दु ।

More Stories Like this