सुसाकुसाय् ध्यान तयेमाल

सम्पादकजु
सुभासचन्द्र सुवाल गाःहिति त्वाः ख्वप ।

दँय्दसं थें थुगुसी नं तांन्वया आपालं ल्वय् लगे जुइगु सम्भावना खने दयाच्वंगु दु । थज्याःगु इलय् नं खानेपानी संस्थानं माःगु लःया व्यवस्था धाःसा याना बीफुगु खने मदुनि । खानेपानी संस्थानं आः लःया मुहान हे सुना वनाच्वंगु खँ धयाच्वंगु दुसा लः नं छन्हुअतः वा निन्हुअतः जक वइगु जूवंगु दु । त्वनेगु लः तकं मदुगु कारणं समस्या ब्वलनाच्वंगु थ्व इलय् वसः हिइगु नितिं व ब्यक्तिगत सरसफाईया नितिं ला झन हे लः अभाव जूवंगु दु ।

लःया अभावया नापनापं आः वयाः थीथी ल्वय् नं सरे जुइफुगु सम्भावना खने दयाच्वंगु दु । सामान्य इलय् खने दइगु ल्वय् स्वयां तांन्वइगु इलय् खने दइगु ल्वय् तसकं ग्यानापुइ नं यः । तांन्वइगु अप्वल कि आकास धर्ती धपक्क त्वइ । मनूतय्त आलस्य व दिक्क जुइ । उगु इलय् हे थीथी मनोराजन याये मालीगु खः । अले नखःचखः नं वइ । तर नखःचखः वइगु इलय् नयेगु पुलां जुल धाःसा झन हे झीत मनिनीगु जुयाच्वन । लःया अभावं नसाज्वलं नं बांलाक सिलाः व सरसफाईलय् ध्यान तयाः तयार याये मफइगु स्थिति जुइफु । अथे जुयाः तांन्वयाः च्वने हे मफइगु इलय् तकं म्वःल्हुइगु प्रवन्ध याये मफइगु स्थिति जुयाच्वंगु दु । उकिया विकल्प नं बिचाः याये फयेकेमाल । त्वनेगु लःया ला बिकल्प हे मदु । तुंथि व बुंगाःचाय् तकं लः सुनाच्वंगु स्थिति दु । अथे जुयाः आः खानेपानी संस्थानं थीथी त्वाः त्वालय् लःया बन्दोबस्त यायेगुनिसें स्थानीय निकायतय्सं माःगु सरसफाईया नं प्रवन्ध मिले यायेमाःगु खनेदु । यदि अथे मयायेगु खःसा थीथी ल्वय् जुयाः जनशक्ति हे ह्रास जुइगु वा म्वाः मदुगु थासय् खर्च अप्वयेके मालीगु तकं सम्भावना खने दयावःगु दु । अथे जुयाः सम्बन्धित निकायया ध्यान वनेमा धकाः सम्पादक मार्फत सकसितं इनाप यानाच्वना । सकसियां उसाँय् भिं जुइमा ।

More Stories Like this

केन्द्रया अनुमति कयाः आर्थिक ज्या जुइ मखु
प्वंकेमखंगु श्रद्धांजिल
सुवर्ण शाक्य कि सुवर्णकेशरी ?
लाःलाःथें भाःथकाये मजिल
बांलाःगु सुझावयात सुभाय्