ल्यासिपिं ल्यत्तु ल्यः जुया

सुजिता माःजु

जिमिगु बिहा जूगु अथेहे बाःछिति लिपा जिपिं मनकामना वनेगु क्वछिना । शनिवारया दिं लाकाः जिपिं निम्हतिपु मनकामना वना । मनकामना वनेत केबलकारया ब्यवस्था जुइधुंकूगुलिं थाकुक न्यासि वनेगु सिबें अपुगु लँ लिना । केबलकारया टिकट काये धुंकाः निम्हं केबरकारय् दुहां वना । कारय् खुम्ह तक न्ह्यंगुलिं छखे स्वम्ह,मेखे स्वम्ह यानाः खुम्ह मनूत दुथ्याकल । जिपिं धाःसा निम्हं छखे हे प्यपुंक च्वना । अँ छता खँ सीकेमाःगु,मनूत दुहां वनाच्वंसां कार दिकी मखु,बुलुहुँ न्ह्याकाः हे च्वनी । उकिं भतिचा हथासं दुहां वनेमाः । जिपिं च्वनागु कार नं बुलुहुँ न्ह्यात स्टेशन त्वःते धुंकाः धाःसा कारं गति काल । झिन्यागु मिनेटं च्वय्या क्वचागु स्टेशन थ्यनी धकाः धाःगुलिं जिपिं कारय् दुनेच्वंपिं सकलसिनं आधुनिक ईलेक्ट्रिक अविष्कारयात सुभाय् ब्युब्युं वना ।

दथुइ थ्यंकाः धाःसा कार दित,छाय् दित जिमिसं मस्यू,तर अन च्वयाः तिकातल -'छुं जुयाः कार बुलुहुँ न्ह्यात अथवा दित धाःसां ग्याये म्वाः । 'थथे च्वयातःगुलिं जिपिं धुक्क जुल,अथेनं छम्ह ल्यासेतिनिम्ह मिसां प्वाक्क न्वंहे वात -'लच्छि न्ह्यः प्राविधिक गढबढ जुयाः कार कुतुंवंगु अले मनूत सकलें घाःपाः जुल,प्रचार जुइ धकाः घाःपाः जूपिन्त ब्यवस्थापन पक्षं माक्व आर्थिक ग्वाहालि बिल हँ ।'जिमिगु चिम्स तिंतिं स्वात । जिं धया -'खइमखु,अथे नं जुइ ला,केबलकार विरोधीतय्गु जालसाज खँ जक जुइका ।'जिगु खँय् जिमि मिजंम्हं तने थें यानाः धयादिल-'थौंकन्हेया जमानाय् नं धेबां खँ तिके फइ ला ?यदि व दुर्घटना जूगु खःसा तुरुन्त मिडियाय् पिहां वइ नि । थ्व ला पक्का हे जालसाज खँ जुल का ।'जिमिगु खँ न्यनाः मेपिन्सं नं खइ हे मखु धकाः लिसः बिल । व मिसाया छु याय् छु याय् थें जुल । लिपा हाकनं धाल -'जिं नं मस्यू,जिं नं न्यनागु खँ जक,थ्व हे खँ न्यनाः मवसे च्वनागु,भाकल दुगुलिं जक वयागु,छिकपिन्सं धयादीथें जालसाज खँ नं जुइफु ।'जिमि खँ ल्हानाच्वच्वं कार बुलुहुँ न्हृयात । पन्ध्र मिनेटं थ्यनी धाःथाय् निन्यागू मिनेटं च्वय् थ्यन ।

स्टेशनं तप्यंक मनकामना दर्शन याय्त वनाः । लाइन तसकं तःहाकःगु जुयाः जिपिं लाइनय् च्वनाः द्यः दर्शन मयाय्गु निर्णययाना । जिमिसं यंकागु पुजाज्वलं फुक्कं लाइनय् च्वनाः च्वंम्हय्सित बीगु निर्णययाना । पुजाज्वलं छम्ह लाइनय् च्वनाच्वंम्ह बुढीम्ह मिसायात बीत्यना । जिमि मिजंनं धाःसा जितः सालाः यंकल,छाय् धकाः न्यनाः वय्कलं धयादिल -'बुढीतय्गु पुजा ज्वलनय् इमिगु मनोकाञ्छा हे आपाः दइ,उमिगु पुजाज्वलनय् झीगु मनोकाञ्छां थाय् काय् फइमखु उकिं नकतिनिपिं ल्यासेपिनिगु पुजाज्वलनय् ल्वाकः छ्याय्माः ।'जितः नं खःथें ताल,जिपिं निम्हेसिनं ल्यासिपिं ल्यत्तुल्यः जुया ।

Related Stories

जः
सांसद

More Stories Like this

बाखं च्वये मखुनी
परिवेश (मुक्तक बाखं)
बायावंगु लँपु
हेँग्वाः जूम्ह मनू
ब्लू-डल बाखं ब्वनेधुंकाः